The Definitive Guide to Living in the Capital , Cairo , Egypt

مطاعم
لينوز – Lino’s

لينوز: مطعم إيطالى كلاكيت ثاني مرة فى أركان مول

  • أركان مول - أمام مدينة زايد 2000 - الشيخ زايد
  • إيطالي
تم التقييم بواسطة
Angie El Batrawy
قيم
قيم الآن
لينوز: مطعم إيطالى كلاكيت ثاني مرة فى أركان مول
مطعم «لينوز» كان لنا سابق تجربة معاه فى فرعه فى الزمالك المطل على النيل، اليوم ده كان استثنائي ومن المرات اللى نفتكر تفاصيلها، خاصة أنه كان يوم مشمس والمنظر على النيل كان خلاب، لكن هل فرع أركان مول بنفس الحلاوة والمستوى؟
الحقيقة أن كل مكان له مميزاته وعيوبه، لكن عامة إحنا اتبسطنا فى الفرع الجديد للمطعم الإيطالى اللى فريق عمله كان ودود معانا جدًا وعوضنا عن اللخبطة اللى حصلت فى الطلب اللى هـ نذكرها بالتفصيل دلوقت.

بعد ما اختارنا مكان الجلوس فى المنطقة الخارجية (للى مش عارف طبيعة المطاعم والكافيهات فى أركان مول كلها فيها مكان للجلوس مغلقة ومفتوحة) لأن المكان هناك معروف بنسيم الهواء المنعش اللى حتى لو فى وسط القاهرة بـ يكون حر هـ تلاقى الجو هناك لطيف وهواءه عليل، المنيو مش غريبة علينا طبعًا لكن واجهتنا نفس مشكلة المرة اللى فاتت فى نطق أسماء الأطباق باللغة الإيطالية، واستحالة تطلبها بالاسم من غير ما تقرأ وصف مكونات الطبق الأول لأنك مش هـ تفهم الطبق ده إيه، المهم اختارنا فيليتو ألا جريجليا (89 جنيه) وهو شريحة فيليه بيف مشوي مع صوص الليمون اللى اختارناه وبـ ينزل معاه خضار مشوي وبطاطس محمصة أو مشوية، كمان طلبنا لازانيا فريسكو (45 جنيه)، وسكالوبين ألا ميلانيز (74 جنيه) وهو عبارة عن سكالوب مقلى وعليه شرائح جبنة وتركي ومعاها باستا اللى اختارناها بيننا وبصوص أبيض (أنت اللى بـ تختار نوع الباستا والصوص).
نزل لنا زجاجة مياه معدنية كبيرة (12 جنيه)، طلبك بـ يزيد عليه 12% خدمة و10% ضريبة، فيه حاجة اكتشفناها فى الشيك بعد ما مشينا اسمها Ex.meet  بـ 10 جنيه بس إحنا مش فاهمين دي بتاعة إيه! الأكل اتأخر شوية رغم أنهم قالوا فاضل 20 دقيقة، حصلت حاجة غريبة أنهم سألونا عاوزين صوص أبيض ولا أحمر مع طبق الفيليتو ألا جريجليا رغم أن نازل معاه خضار!

لما جاء الأكل اللى كان شكله شهي جدًا اكتشفنا هما سألونا على موضوع الصوص ليه، لقينا نازل باستا مع البيف بدل الخضار والبطاطس، ولما سألنا الجرسونة اللطيفة اللى كانت معانا أن مش ده اللى مكتوب فى المنيو رجعت للمطبخ وقالت لنا أنهم آسفين على الخطأ وهـ ينزلوا لنا الخضار فى أقرب وقت بجانب الباستا كمان، كانت حركة حلوة منهم، وجاءوا كمان بعد ما خلصنا وسألونا على رأينا فى الأكل ولو فيه مشاكل، خدمة تمام.

الأكل كان تمام جدًا، الخضار كان مولع (مش سخن بس) وكان شهي وطازج، صوص الليمون كان خرافة وحطيناه على كل حاجة أكلناها تقريبًا، البيف كان محتاج شوية تسوية صغيرة لكن كان تحفة، اللازانيا كانت وهمية وسخنة جدًا، الصوص والبشاميل كانوا جامدين، السكالوب برضه ما يقلش حلاوة، الباستا كانت محتاجة تتطرى شوية لكن كان طعمها حلو برضه.
مسك الختام –واللى دخلنا اختارناه بنفسنا من ثلاجة العرض- تارت كوفى أند مارس (29.95 جنيه) اللى كان جامد جدًا بصوص الشوكولاتة وقطع المارس والكريمة، اتمزجنا.

“لينوز” مكان لطيف وخدمة كويسة وأطباق فى الجون.. مع شوية تضبيط مش هـ يقل حلاوة عن فرع الزمالك لأن كان غريب برضه لما لقينا نمرة تليفون فرع الزمالك فى الشيك بتاعنا!.. لو عاوز تعرف تفاصيل أكثر زور صفحتهم على الفيسبوك.

نصيحة 360

ننصحك لما تأكل تارت الكوفى أند مارس أنك تقسمه مع حد، الصوص والشوكولاتة دسمة شوية، لكن طعمها حلو جدًا.

أحسن حاجة

صوص الليمون إزاى كان جامد كده؟

أسوأ حاجة

اللخبطة اللى حصلت.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح