The Definitive Guide to Living in the Capital , Cairo , Egypt

مطاعم
Zakuski – زاكوسكي

محل زاكوسكي -Zakuski: مُقبلات ونقنقة صحية في أرض الجولف

مطاعم، مصر الجديدة، مقبلات
  • 83 شارع نبيل الوقاد - مصر الجديدة
تم التقييم بواسطة
Shaymaa El Gammal
قيم
قيم الآن
محل زاكوسكي -Zakuski: مُقبلات ونقنقة صحية في أرض الجولف

وإحنا بنتمشى الأسبوع إللي فات في أرض الجولف لفت نظرنا محل جديد صغير فتح في الشارع.. يافطة بسيطة شيك مكتوب عليها Zakuski.. بصراحة اسم المحل لفت نظرنا ولقينا نفسنا داخلين المحل نشوف بيقدم إيه بالظبط. 

زاكوسكي -Zakuski  كلمة روسية معناها المقبلات Appetizers وفعلًا ده الشئ إللي هتحس إنه مسيطر على المكان أو هتحس إنه المكان متميز ومتخصص فيه.. المقبلات.

فيه نظريتين موجودين واحدة بتقول إنه المقبلات بدأت من روسيا والنظرية التانية بتقول إنه المقبلات بدأت في الصين ولكن انتشرت للعالم من روسيا.  زاكوسكي بدأ من 4 سنين كمشروع متخصص في الـCatering للحفلات ودلوقتي بقى محل كمان : زاكوسكي هو أول فرع لمصنع “بيترز “وهو مصنع متخصص من أربع سنين فى التوريد للحفلات والفنادق.

المحل مكانه مميز جدًا.. شارع نبيل الوقاد، شارع واصل بين مدينة نصر ومصر الجديدة وفي قلب أرض الجولف وده بيخليه يخدم سكان كذا منطقة واللطيف كمان إنه فاتح جنب جيم وده بيوفر نقنقة صحية قبل أو بعد التمرين بسهولة لأعضاء الجيم. لما دخلنا المحل دردشنا شوية مع العاملين فيه علشان نتعرف أكتر عل فكرة المحل.

المكان بيقدم حاجات خفيفة تنفع كفطار، وبيقدم سناك مناسب لنص اليوم وأخيرًا بيقدم مقبلات تنفع كنقنقة على العشا.

زاكوسكي مش كافيه، هو محل صغير تقدر تشتري منه أكل أو تقعد على الترابيزات إللي في المكان تاكل ع السريع أو تشرب وتاكل على الواقف زي On the Run . المكان متقسّم لأقسام مختلفة زي قسم السلطات، وقسم المخبوزات والمشروبات الساخنة والعصاير الطبيعية وقسم المكسرات، و الأطعمة (المقبلات) المجمدة والصوصات الطبيعية، والمقبلات Appetizers والكانابيه والأجبان والمأكولات البحرية المجمدة.

قسم السلطات مميز جدًا، أولًا السلاطات معروضة في برطمانات بلاستيك فتقدر تشوف كل المكونات ومكتوب كمان المكونات إللي موجودة في كل نوع سلطة، أسعار السلطات بتبدأ من 30 جنيه وحتى 60 جنيه، والميزة إنك هتلاقي سلطات جديدة مش منتشرة زي سلطة التفاح والجبنة الريكفور (35 جنيه) إللي جربناها وعجبتنا جدًا، تناغم مكوناتها والصوص بتاعها. السلطات متقسمة لكذا قسم وكل قسم له اللون بتاعه علشان يسهل على كل شخص إختيار النوع المناسب ليه زي السلطات إللي فيها أجبان أو سلطات النباتيين أو سلطات اللحم الابيض أو اللحوم أو الأسماك ومشتقاتها.

بالنسبة للعصاير فهي كلها فريش من غير مواد حافظة ولا ألوان صناعية أما ركن القهوة فبيقدم قهوة بتتطحن في المكان يعني مش سريعة التحضير.

أما قسم المأكولات (المقبلات) المجمدة فالمختلف فيه إنه مش بيقدم الحاجات التقليدية المجمدة وإللي اتعودنا نلاقيها في السوبر ماركت زي الكبيبة والكنافة والسبرينج رولز لكن بيقدم المأكولات إللي بنلاقيها في الكافيهات والفنادق زي الكنافة بالجمبري والفراخ بجوز الهند وأجنحة الدجاج السبايسي على سبيل المثال، والحاجات دي كلها بتتقدم نيئة مش نص مقلية  يعني كل شخص يقدر يعملها بالطريقة المناسبة ليه سواء في الفرن مع مسحة زيت أو مقلية في الزيت.

وجنب ركن المجمدات هتلاقي ركن الصوصات إللي بيميز زاكوسكي  وهو عبارة عن برطمانات فيها صوصات وتتبيلات معمولة في المكان بدون أي مواد حافظة وفعلا طعمها حلو زي صوص الترياكي وصوص البصل وحتى الكاتشب والمايونيز ودول طبعا ممكن نلاقيهم في الهايبر ماركت لكن عليهم مواد حافظة ومكسبات، والطعم فعلا مختلف في زاكوسكي لإنهم فريش و Home made

حبينا قوي قسم الكانابيه وهيرو بايتس هي عبارة عن مخبوزات رقيقة جدًا سواء بالعجينة البيضا أو السمرا الدايت وبيكون عليها من فوق Toppings مختلفة زي الأجبان المختلفة أو السالمون والروست بيف والجمبري والتونة وأسعارهم بتبدأ من 15 جنيه ولحد 30 جنيه للواحدة.  أما الكانابيه فممكن كمان تشتريه بالواحدة وتختار إللي تحبه على صينية مصنوعة من الورق المقوى ومتقسمة علشان تسهل عليك إنك تقدمها لضيوفك في البيت أو في الحفلات.

وأخيرًا ما ينفعش ما نتكلمش عن قسم الأجبان لإنه فيه كل أنواع الجبنة المحلية والمستوردة وحبينا جدًا إنهم عندهم جبن مستوردة قليلة الدسم، وكمان زاكوسكي ممكن يعملك تشكيلة من الأجبان مع المكسرات والـ Cold Cuts أو أي حاجة تختارها وبتترص على صينية زجاج أو قرص خشب Cheese platter ودي فكرة حلوة للحفلات والعشا وكمان ممكن تقدمها كهدية وإنت بتزور حد وأسعارها بتكون حسب الأجبان والحاجات إللي بتختارها وبتتوزن بالكيلو.

في النهاية إحنا إنبسطنا في جولتنا في المكان ده وحبينا إللي بيقدموه ومبسوطين بالكواليتي العالي والأسعار المعقولة والتنويع والتجديد.

نصيحة 360

اطلب إضافتك على واتس آب المحل علشان تعرف كل العروض والأصناف الجديدة

أحسن حاجة

التنوع الكبير في أنواع السلاطات

أسوأ حاجة

مكان بيقدم أكل بالكواليتي الحلو ده وما يكونش فيه قعدة كافيه

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح