The Definitive Guide to Living in the Capital , Cairo , Egypt

دايمًا بنحب نغير المود، وعلشان إحنا من عشاق التراث الجميل قررنا إننا نزور مصر الجديدة، ووإحنا بنتمشى في شوارعها لقينا مطعم اسمه مركادو، الإستايل الخاص بيه جذبنا ليه، فقررنا إننا نجربه وننقل لكم تجربتنا.

مركادو مطعم وكافيه بيفصلك عن العالم خالص، أول ما تشوفه هتحس بفجوة زمنية، بالواجهة اللي بالخشب وفيها زجاج، ومحدش من بره يشوف اللي جوه، وكمان فيه قعدة بره للناس اللي تحب الهواء الطلق، بعيدًا عن أيام الصيف والرطوبة العالية.

لما تدخل المكان هتفصل نفسك عن الخارج خالص، ترابيزات منسقة وفيه منها بنظام الكراسي وفيه نظام الكنب، والإضاءة خافتة والميوزك كله أجنبي وبصوت هادئ، وكمان عرفنا ان المكان بيعمل حفلات لايف كل فترة بيجيب فيها مغني أو مغنية مع عازف.

قررنا نجرب بيتزا ميكسيكانو بـ85 جنيه، وهي عجينة تحس إنها ناعمة معمولة صح، والأطراف مقرمشة و طرية في النص، ومتغرقة بالجبنة الموتزاريلا، وجواها مشكل لحوم ومتحبشة بخضرة وشوية فلفل حراق ممتازين، والحجم يشبع ويكفي بزيادة، وعرفنا إنهم متخصصين في البيتزا ومميزين فيها كمان.

ونزلنا صوص ليمون مع البيتزا طعمه زي الليمون المعصفر وكان حلو جدًا، لازم تجربوه، والمكان مفيش فيه أي ضريبة أو خدمة.

للأسف ماكناش جعانين قوي، وعلشان كده معرفناش نطلب حاجة تاني واكتفينا بالبيتزا، لكن المكان فيه أنواع أكل مختلفة، هتلاقوا فيه كل اللي نفسكم فيه من لحوم ووجبات.

تجربتنا في المكان كانت إيجابية جدًا، وبننصحكم تجربوا مركادو.. أكيد هيعجبكم.