The Definitive Guide to Living in the Capital , Cairo , Egypt

من أنجح أنواع المطاعم في القاهرة اللي بـ تركز على تقديم أكل كويس بأسعار معقولة، الجملة دي ممكن تشوفها غريبة شوية، بس الفكرة أننا تعبنا من كثر لف ودوران المطاعم، نرجوكم، عاوزين نأكل أكلة بسيطة، فيها حاجة دي؟!

بعد ما شق طريقه في مدينة نصر وهليوبوليس من كام سنة، دخل "مصعب" ساحة المنافسة القوية في شارع النصر في المعادي، بنفس الشعار الأحمر اللامع والديكورات البرتقالي، فرع المعادي واسع ونظيف لدرجة كبيرة، بس مافيش أي فرق في الشكل عن أي مطعم فاست فوود ثاني.

الموظف بلبس مصعب البرتقالي بـ يرحب بك على الباب، ولو حبيت تأكل هناك، عندك أماكن قعدة بكراسي حمراء وبيضاء.

مع منيو "مصعب" اللي بـ تركز أكثر على الساندويتشات والوجبات اللي بـ تتكون من نفس مكونات الساندويتشات، مافيش أي مجال لصعوبة الاختيار، طلبنا ستيك سوبر ميل (37 جنيه) مع صوص مشروم وساندويتش كفتة (12 جنيه) وكبدة إسكندراني كومبو (24 جنيه).

تحضير الأكل في مصعب غالبًا سريع، بس شكل التقديم مش ولابد، بصراحة مافيش كلام كثير يُقال عن التقديم.

رغم أنك لما تشوف اسمه تحس بالجوع، وممكن كمان تتحمس، بس للأسف الستيك سوبر ميل كان عبارة عن قطع فيليه مستويّة بزيادة فوق أرز بسمتي أصفر وعليهم صوص مشروم وصوص فلفل، مع بطاطس محمرة، عيش، كول سلو صوص وثومية.

صحيح جودة الفراخ مش رهيبة، والأرز البسمتي ناشف زيادة عن اللزوم، بس كمية الأكل بالنسبة لمبلغ 37 جنيه تعتبر هائلة.

الكبدة الإسكندراني كانت أحسن شوية من الستيك، بس مش أحسن قوي يعني؛ التسوية كانت زيادة من ثاني! الكارثة الحقيقية كانت مع ساندويتش الكفتة.

كان واضح أن الكفتة نفسها مش طازجة، ومن ملمسها نقدر نقول أنها مجمدة، الحقيقة أن الموضوع ده كان مشترك في كل الوجبات اللي طلبناها؛ اللحم كان ناشف خصوصًا عند الأطراف.

"مصعب" مش من المطاعم اللي ينفع تستنى منها جودة أكل عالية، بس الأكيد أنك هـ تشبع من غير ما تدفع كثير، علشان طبعًا بـ نشوف كثير من المطاعم الشبيهة في القاهرة بـ تفضل الكميات والأسعار المعقولة على الابتكار، وطبعًا هي مش دائمًا حاجة وحشة.