The Definitive Guide to Living in the Capital , Cairo , Egypt

رنا شرف

صوت فيروز مرتبط معانا بالقهوة وبس؟ الحقيقة لأ، صوت فيروز بيكون عظمة كمان لما بنسمعه وإحنا في مطعم لبناني، بنحس إننا سافرنا بالفعل لقرى الشام الجميلة والبسيطة. مؤخرًا، جربنا مطعم لبناني بيقدم مأكولات سريعة، والمكان ده في الأصل كان محل مشروبات وعصائر، علشان كدة، ولحد النهاردة اللوجو الخاص به علي شكل فراولة. تعالوا نجرب مع بعض مطعم الوزان.

المكان أشبه بقرية لبنانية، أو ضيعة زي ما حبايبنا في لبنان بيقولوا على القرى. العيش بيتعمل في مخبز كبير أمامك، والعصائر فريش وبتتعمل وأنت شايفها بعينك، وحتي الأكل كله بيتعمل وأنت شايفه.

المكان كبير وشيك، بيتكون من دورين، وفيه أسانسير داخلي، وصوت فيروز والأغاني اللبنانية مسيطرة في المكان، يعني هتسمعها في كل مكان هناك.

نيجي بقي  للأكل؛ جربنا سلاطة الفتوش، كان سعرها 70 جنيه، السلاطة كانت حلوة وفريش، وقطع الخبز المحمص كانت حلوة بجد، ومافيهاش غلطة.

جربنا كمان سمبوسبك بالجبنة وكانت حلوة وحشو الجبنة فيها حلو وكتير، ودي سعرها 70 جنيه.

طلبنا طبق كبدة فراخ، بسعر 85 جنيه، وكان حلو قوي ومظبوط، ومتقدم حلو.

كمان طلبنا معاه طبق مشاوي، بسعر 220 جنيه، وده للأسف كان مخيب للآمال، الطبق نزل بارد علي عكس الطبيعي والبطاطس اللي مع الطبق كانت باردة، وطلبنا منهم يسخنوه وعملوا ده بكل احترافية، واعتذروا لنا بشكل عملي من خلال طبق ضيافة عبارة عن بقلاوة لبناني.

الطبق لما اتسخن طعمه بقي أحلي، ونتمنى ياخدوا بالهم من الأمر ده دائمًا بعد كدة.

نيجي بقي للعصير، طلبنا من عندهم كيوي، وكان فريش ولطيف.

تجربتنا بشكل عام كانت حلوة، وممكن نكرر الزيارة تاني.