The Definitive Guide to Living in the Capital , Cairo , Egypt

سمعنا عن مكان كويس في المعادي، وبالتحديد في شارع 263، بيعمل أكل في طاسات، وبيتميز إن كل طاسة فيها جبنة موتزاريلا بتفرق في الطعم كتير، وإحنا في كايرو 360 قررنا نجرب الأكل عندهم بدون تردد أو تأخير، بنتكلم عن مطعم خلطة Bita.

دخلنا المطعم، اللي الديكور بتاعه غريب، يعني الحيطان طوب أحمر وفي نفس الوقت معلقين طاسات على كل جنب، وحيطة فيها ورق تحس أنه جرايد وشبيه لضهر المنيو الخاص بالمكان، وتحس أنه فعلًا كل حاجة خلطبيتة.

طلبنا أول حاجة شاي مرمرية، ماهو المكان بيبان من “الشاي بتاعه”، وطلع تحفة، والبراد عمل كوبايتين مش واحدة بس، وسعره 10 جنيه.

الجديد بقى إنك مش بتطلب طلبك بالصوت، لأ أنت بيجيلك ورقة المنيو مطبوعة ومعاها قلم، وبتعلم على طلبك ولو عاوز أي إضافة بتكتبها وبالتالي بتتنفذ، وبعد كده الويتر بيراجع طلبك ويغيب تقريبًا 15 دقيقة وينزل طلبك.

إحنا حبينا نجرب أكبر قدر ممكن من الأكل ودا كان شئ صعب بس جربنا من كل نوع حاجة، طلبنا طاسة سجق بالجبنة، الطاسة كانت حلوة والتتبيلة خفيفة ونزلت دافية، أما بطاطس الجبنة فكانت مميزة بطعم يفتح شهيتك لأي حاجة، أما طاسة الكبدة الغموز فكانت حلوة ولكن باردة.

أما المكرونة بالسجق والكبدة، فينطبق عليها المثل اللي بيقول “الطعم الأصلي.. له صاحب”، ورغم اننا اختلفنا في تقدير حلاوتها ولكن اتفقنا على انها ناقصها تكنيك يديها حلاوة طعم بزيادة، وممكن يكون إنها تنزل سخنة مش دافية، ولازم تكون أكيل علشان تقدر تخلصها، وجربنا السندوتشات “التفويلة”، اللي حجمها صغير جدًا ومننصحش بيها لوحدها علشان مش هتشبعك لو أنت جعان، وكمان طعمها مش زي الطاسات وكانت باردة.

بعد ما خلصنا أكل طلبنا شاي تاني وشربنا واتمزجنا وانبسطنا، وسط جو هادئ ومميز.

علشان تعرف أكتر عن المطعم، ممكن تزور صفحتهم من هنا.