The Definitive Guide to Living in the Capital , Cairo , Egypt

رنا شرف

بالتأكيد الأكل المصري له عشاقه وجمهوره، مش بس في مصر، ده في العالم كله. مين مايحبش المحاشي والبط والملوخية، ويا سلام لما نحلي بطبق أم علي ونحبس بشاي بالنعناع، عظمة يا مصر والله! لو كنت بتحب الأكل المصري يبقى لازم تجرب مطعم ريش & Steak، واللي بيقدم لك أكلات بروح مصرية جدًا.

تعالوا نحكي لكم أكتر عن تجربتنا في مطعم ريش & Steak.

المطعم موجود في مصر الجديدة، أول ما هتدخله هتحس بجو مصري أصلي، من ديكورات علي الحوائط، لتابلوهات فيها وشوش مصرية من النوبة والريف، ولحد الترابيزات الشيك، وقبل كل شيء أسماء الأكلات! كمان المطعم فيه كيدز إيريا صغير للأطفال، يعني لو معاك أطفال هتستمتع.

نيجي بقي للأكل؛ المنيو مليان أطباق ووجبات من كل صنف ولون، فيه صواني اسمها الكبير أوي، ومربوحة، وهدرس اللي هو أصغر صينية. إحنا طلبنا صينية هدرس، واللي كان فيها ربع كفتة وربع كباب وربع سمبوسك لحمة مفرومة وجبنة وأرز بسمتي وكتكوت بلدي، ودي سعرها 510 جنيه.

الصينية كانت مميزة جدًا، طعم الكفتة كان عظمة ومتتبلة تتبيلة جميلة، والكباب معقول لكن كان ممكن يكون أفضل، أما الكتكوت أو الفرخة الصغيرة فدي من الحاجات اللي حبيناها جدًا.

نزلنا كمان مع هدرس شوربة بلسان عصفور، وكانت جميلة وطعمها بيتي جدًا.

من السلطات طلبنا بابا غنوج بـ22 جنيه، وفتوش بـ45 جنيه، كنا نتمنى يكون مع الفتوش دبس رمان أكتر، بس بشكل عام أستمتعنا.

كانت لفتة جميلة من المطعم إننا ناخد خصم 15% في أي وقت نروح المطعم، بسبب إننا كنا أول مرة نزوره.

ريش & Steak مطعم جميل ويستحق التجربة، وأكيد هنكرر الزيارة.. في يوم قريب!