The Definitive Guide to Living in the Capital , Cairo , Egypt

الأكل البيتي لما أي ست شاطرة بتعمله بيكون له ريحة وطعم وروح مختلفة، وزي ما بيقولوا “لها نفس”، علشان كده من النادر إننا نلاقي أكل مطعم زي الأكل البيتي، ولكن مطعم “طشة”، حقق المعادلة الصعبة اللي من خلالها قدر أنه يقدم أكلات مصرية 100% وبإمكانيات عظيمة وأسعار في متناول الجميع، ورغم بساطة المكان إلا أنه بيقدم خدمة عظيمة بجودة عالية.

خلال السطور الجاية هنقول لكم على تفاصيل تجربتنا في مطعم “طشة” اللي فتح مؤخرًا في وسط البلد.

المطعم ديكوراته واخدة الشكل المصري البسيط، وجامعة ما بين الديكور الصعيدي والتراث النوبي لكن بأسلوب عصري، وهنا هو جمع ما بين عبق الماضي وروح العصر، وده عمل دويتو حلو خلى المكان لطيف وخفيف، وفريق العمل رغم ان عدده مش كبير إلا أن عندهم شغف لخدمة عملائهم بشكل كبير.

بدأنا تجربتنا معاهم بشوربة لسان عصفور وكان سعرها 15 جنيه، وخلينا نقول إنها شوربة بيتي أصيلة هتستمتعوا بأكلها ومش هتقدروا تقاوموا جمالها، وكمان طلبنا محشي مشكل سعره 40 جنيه، والطبق كان فيه ورق عنب مسكر وصغنن، وكرنب طعمه حكاية، وفلفل محشي بيدوب، وباذنجان محشي معقول.

وعلشان تجربة أي أكل بلدي محتاجة صنف تقيل فطلبنا طاجن بامية باللحمة وكان سعره 65 جنيه، وخلينا نشرحه بالتفصيل؛ أولًا الطاجن فخار ومن سخونته وشكله فهو متسوي فيه البامية وده شيء عظيم، أما اللحمة فكانت محتاجة تسوية شوية لأنها كانت بتشد وبتاخد وقت في المضغ، ولكن طعمها كان حلو، والبامية كانت متسبكة كويس وعجبنا أن الصلصة بتاعتها مظبوطة وماسكة نفسها، بس ياريت يزودوا الكمية شوية.

تجربتنا على الرغم من أنها ماكنتش لأكلات كتير من منيو المكان، إلا أننا انبسطنا بيها وأكيد هنجرب من عندهم أكلات تانية وتالتة.

وعلشان تعرفوا أكتر عن مطعم طشة تقدروا تزوروا صفحتهم على الفيسبوك من هنا.