The Definitive Guide to Living in the Capital , Cairo , Egypt

الفيو على نيل مصر حاجة مش محتاجة وصف علشان مهما وصفنا مش هنوفيها حقها. القعدة على النيل حاجة كده بتمس الروح وتخليكم في عالم تاني من الهدوء النفسي ومهما كنتم مرهقين هتعملوا ريفريش. علشان كده لما شفنا إعلان لمطعم “لسه فاكر” قررنا نروح ونخوض تجربة جديدة في أشهر مراكب النيل “نايل سيتي” الزمالك.

خلال السطور الجاية هنقول لكم على تفاصيل تجربتنا في “لسه فاكر”.

المكان في الدور الثاني من المركب ومافيش أي لافتة واضحة توصلنا لطريقه، وسألنا عليه أكتر من مرة علشان نوصله، ولما وصلنا لقينا كراسي خشب من اللي بتعجبنا وبننبسط لما نشوفها علشان بنحس بروح زمان، ولكن دخلنا سألنا على الحجز بتاعنا، فإحنا واقفين في مدخل المكان وبالقرب مننا شخص ما مسئول في المكان بيسألنا بصوت عالي هو أنتم حاجزين غداء ولا حفلة، فقلنا غداء ومش هنحضر الحفلة اللي معمولة، فرد برضه وهو قاعد مكانه، والشيشة في بقه! قال لنا أقعدوا في أي مكان عادي، وكل ده وهو حتى مافكرش يقوم يشوف العملاء اللي داخلين له أو حتى تنازل عن الشيشة!

حقيقي رغم سوء التصرف لكننا ضحكنا كتير لأننا حسينا أننا داخل فيلم كباريه، خاصة أن طول الوقت صوت المسئول ده كان عالي سواء في طلب حاجة أو التعامل مع العملاء وكمان تعنيف حد من فريق العمل بنفس الطريقة، وكنا بنحاول نأقلم نفسنا أننا في تصوير فيلم كباريه علشان نقدر نزق اليوم.

فريق العمل مش بروفيشنال نهائي، وعندهم المنيو إلكتروني ولكن أي شبكة نت هناك ضعيفة، ولما سألنا على منيو ورق قالوا مافيش طيب واي فاي قالوا لنا ضعيف جدًا ولازم نت قوي علشان المنيو يتفتح، وكمان منيو المشروبات مش موجود وهيتقال لكم من الويتر علشان مشروباتهم مختلفة عن المنيو، وهي الحقيقة ماكنتش بداية مبشرة ولكن قررنا نكمل.

طلبنا في البداية طبق ممبار محمر بسعر 85 جنيه، وهو كان متوسط المستوى مش أفضل حاجة ولكن أهم حاجة أنه ماكنش زفر ودي كافية إننا نقول إنه مقبول، وكمان طلبنا طاجن ملوخية بسعر 55 جنيه، وأكيلة الملوخية عمرهم ما هتعجبهم لأنها “سقطت” منهم ومش لطيفة خالص.

طلبنا كمان طبق شوربة لسان عصفور باللحمة بسعر 100 جنيه، وللأسف لا طريقة التقديم ولا التسوية ولا نوعية اللحمة كانوا كويسيين ومافيش أي حاجة إيجابية فيه لدرجة إننا مقادرناش نكمله. طلبنا كمان طبق محشي مشكل بسعر 75 جنيه، كان فيه ورق عنب تخين قوي والحشو قليل، ومش مستوى كويس، وباذنجان مش لطيف، وقرن فلفل كان كويس والكوسة ماجربنهاش علشان استكفينا.

وطلبنا ميكس جريل بسعر 275 جنيه، كان فيه صباعين كفتة كانت حلوة، و4 قطع كباب تتبيلتهم كانت حلوة، وكام قطعة فراخ مقبولين، وتمن ربع قطعة حواوشي ملهاش أي لازمة بالحجم ده وطعمها غير مقبول نهائي.

خلينا نأكد أن المكان غير مناسب للأطفال بعد الساعة 9 مساءً لأنه بيكون فيه حفلات ومشروبات كحولية بشكل أكبر، وتجربتنا بالكامل مكنتش لطيفة لدرجة أننا رفضنا نجرب المشروبات عندهم والحلو لأننا أخدنا انطباع مش لطيف من الأول، وقررنا أننا مش هنديهم فرصة تانية لأن بعيدًا عن مستوى الأكل، فالخدمة وطريقة التعامل مكنتش لطيفة من وجهة نظرنا وفيه فرق بين أننا داخلين مطعم في مكان كبير زي بلو نايل وبين كباريه درجة ثالثة ومعاملته.

تقدروا تعرفوا أكتر عن مطعم لسه فاكر من خلال صفحة الفيسبوك من هنا.