The Definitive Guide to Living in the Capital , Cairo , Egypt

الجمع ما بين فيو رائع على النيل وأكل بجودة عظيمة مش حاجة سهلة أبدًا، ولكن تخيلوا بقى أننا لقينا مكان متميز بجد من حيث الفيو والخدمة والأكل والديكور وكل حاجة. أيوة زي ما بنقول لكم، المكان ده اسمه Bellaila واللي تقدروا تاكلوا فيه أو تشربوا ومناسب كمان لحفلات الخطوبة وأعياد الميلاد وغيرها من المناسبات السعيدة، وهننقل لكم تجربتنا اللي بشكل عام بسطتنا وخلتنا واخدين قرار نرجع تاني لهم علشان نجرب أكلات أكتر من عندهم.

المكان على كورنيش النيل في الدقي، ورغم أنه مخفي لكن مايتوهش، وأول ما تدخلوا هتلاقوا على اليمين توضيح أن الحد الأدنى للطلبات 200 جنيه، ويفضل أنكم تتصلوا تحجزوا قبل ما تروحوا ومتنسوش تأكدوا عليهم أنكم عاوزين تقعدوا ع النيل مباشرة، أما ديكورات المكان فهي مبهجة، وتحسوها كده بتنقلكم من عالم لآخر وبتتميز باللون الأبيض اللي مغطي على كل حاجة هناك ما عدا فريق العمل اللي لبسهم مش مميز وممكن ماتعرفوش تندهوا على حد لأن مفيش حاجة تميزهم، ولكن مجرد ما تبصوا حواليكم هتلاقوا حد جاي يسألكم لو يقدر يساعد بلطف وذوق.

بدأن تجربتنا أننا طلبنا حواوشي مكس تشيز، وكان سعره 80 جنيه، وبينزل متقطع كده وسهل في الأكل، ومعاه “جلوفز” علشان إيديكم تفضل نضيفة، وطعمه كان حلو وبيستخدموا أنواع جبن جودتها عالية.

طلبنا كمان ستيك بالمشروم سعره 250 جنيه، وهو معمول بحلاوة وطعامة جدًا، وطعمه عجبنا خاصة أن تسوتيه كانت ميديام، وكان معاه بوريه طعمه لطيف، وأرز بسمتي مش وحش ولكن مش أحسن حاجة.

وبعدين طلبنا قهوة سعرها 40 جنيه، وبصراحة تستاهل علشان البن عالى الجودة والتسوية مظبوطة.

أما الحلو فقررنا نجرب أم علي وسعرها 65 جنيه، ونزلت لنا دافية وكانت متغرقة في المكسرات ومش هتقدروا تقاوموها، وماتنسوش أن كل الأسعار غير شاملة الضريبة والخدمة.

وعلشان تعرفوا أكتر عنهم زوروا صفحتهم على فيسبوك من هنا.