The Definitive Guide to Living in the Capital , Cairo , Egypt

بقلم وتصوير: رنا شرف

كتير من المصريين بيعشقوا كل ما هو هندي، بداية من السينما، ومرورًا بالأغاني والرقص، ووصولًا للأكل المميز بالتوابل الشهية، علشان كدة كان طبيعي نزور India Gate Restaurant، واخترنا فرع المهندسين، وهناك حسينا فعلًا إننا مرينا من بوابة سحرية نقلتنا لعالم الأكل الهندي الجميل.

من أول ما هتدخلوا المطعم، هتحسوا إن الجو هندي جدًا، من أول الديكور ولحد الموسيقى، وطبعًا رائحة التوابل اللي هتسحوا بيها في كل مكان.
حتى الأطباق اللي بتتقدم شكلها هندي أصلي، يعني لو بتحبوا الهند وجوها هتلاقوا نفسكم قوي هناك.

جربنا من المقبلات سمبوسة، علشان أكيد مش هنروح المطعم ومانجربش السمبوسة الهندي، ولو أنت متعود على شكل السمبوسة العادية مش هتلاقيها هناك بنفس الشكل هناك، لإنها مختلفة وعلى الطريقة الهندي، وطعمها كمان مميز ومختلف. كانت لذيذة قوي، وسعرها معقول، 35 جنيه بس.

نيجي بقى للأطباق اللى جربناها؛ أول طبق جربناه كان برياني دجاج، وده عبارة عن أرز بسمتي مع فراخ متبهرة على الطريقة الهندية، وده كان طبق لطيف، ويمكن بعضنا جربه، خصوصًا الناس اللي سافرت الخليج، الطبق كميته معقولة، وسعره 95 جنيه.

تانى طبق جربناه في المكان كان فراخ بالمسالا، ودي بقى فراخ عادية بس عليها صوص المسالا، عبارة عن بهارات مكونة من صلصة بخليط كمون وزنجبيل وقرفة وفلفل أسود وببريكا. الطبق رايحته قوية وطعمه بيكون سبايسين الطبق كان جميل بس طبعًا لو عندك مشكلة مع الأكل الإسبايسي ماننصحكش بيه قوي، وده سعره 85 جنيه.

جربنا كمان طبق لاسوني تكا، ودي عبارة عن صدور دجاج تندوري بالزبدة والثوم والبهارات الهندية، بصراحة طعمها وهمي، وسعرها 110 جنيه، والكمية جميلة والطعم تحفة والفراخ طعمها جميل ومتسوية بشكل حلو قوي.

تجربتنا في المكان كانت إيجابية جدًا، وأكيد هنكرر الزيارة.