The Definitive Guide to Living in the Capital , Cairo , Egypt

  • شارع 232 متفرع من شارع 213 - ميدان فيكتوريا - دجلة المعادي
  • 09:00 - 23:59
تم التقييم بواسطة
Mohamed Talaat
قيم الآن
مطعم Restless المعادي.. كل حاجة مظبوطة ومعمولة بحب!

المطاعم والكافيهات كتير، وكل واحد منهم بيتميز بحاجة محددة، وطبعًا الديكور وخلافه بيكون أهم وأول ثمة في الاختلاف، وده علشان زي ما بيقولوا العين بتاكل قبل الفم، وكتير من المطاعم بتعمل ده بدون تميز في الخدمة، ولكن في Restless الموضوع مختلف تمامًا، وهما بعيدًا عن ديكوراتهم إلا أنهم اهتموا بتطوير الخدمة والجودة اللي خلى المكان عندهم مميز عن أماكن كتير، وبكده هما جمعوا “الديكور – الخدمة – الجودة”.

إحنا في كايرو 360 قررنا نخوض التجربة وعلشان تبقى التجربة مميزة رحنا المكان مرتين. خلال السطور الجاية هنعرفكم على كل اللي محتاجين تعرفوه عن Restless المعادي.

أول ما توصلوا المكان الديكور الخارجي بتاع الكريسماس والنيو يير مش هيخليكم تدخلوا لأنكم هتقفوا تتصوروا وتاخدوا أحلى سيشن من قبل ما تدخلوا المكان، وأوا ما تدخلوا هيستقبلكم شخص من فريق العمل وهيقعدكم، سواء في القعدة الخارجية اللي هي الأكبر والأحلى، أو الداخلية لو الدنيا زحمة، وهيبلغكم أول ما تفضى ترابيزة بره، ودايمًا فريق العمل هيكون مبتسم وحواليكم مهما كانت الدنيا زحمة، ولو حابين تهزروا هيهزروا ولو عاوزين تتعاملوا بروفيشنال هيتعاملوا، ولو سألتم أي سؤال في اختصاصهم هيجابوا باستفاضة وحب.

بدأنا تجربتنا بتجربة منقوشة زعتر، سعرها 35 جنيه، صحيح طلبناها جبنه وجات سادة، لكن طعمها كان عظيم والزعتر كان توزيعه وكميته معتدلة، وبعدها جربنا شوربة ريستليس بالفراخ والمشروم بسعر 40 جنيه، ونزلت لنا في رغيف عيش، ودي من النوادر اللي نشوف فيها شوربة في رغيف عيش، ولكن الغريب أن العيش كان طري من بره، ولكن متماسك من جوا ومحافظ على الشوربة، وطعمها مش متغير، أما الشوربة فحسينا أول ما شفناها أنها “طحينة”، واتخضينا من القوام، ولكن لما دوقنا الشوربة كانت ممتازة، ولكن الفراخ كانت بتشد شوية بس مش مأثرة قوي، والمشروم كان لطيف، وخلينا نقول صحيح السعر قليل بس هما محتاجين يزودوا شوية الفراخ والمشروم علشان نستمتع أكتر.

كمان جربنا من عندهم سموكد تركي بالجبنة بسعر 110 جنيه، وكان طعمه حلو وصحيح إحنا محبناهوش “ساقع” لكن خلصنا عليه من حلاوته، وقدامكم خيارات كتير أنه يكون عيش أو توست، بني أو أبيض، يعني كل اللي نفسكم فيه هتلقوه، وبييجي معاه شيبسي في باكت مكنش مليان زيت زي ما بنشوف، وطبعًا جلافز علشان تاكلوا براحتكم.

دخلنا بقى على التقيل قوي، وطلبنا بيتزا جمبري أمريكان مش ايطاليان وكان سعرها 170 جنيه، ودي كانت من ترشيح الويتر اللي وافقنا عليه، وخلينا هنا نقف قليلًا للطعم الجميل والكوالتي العالي ونوعية الجمبري الممتازة وخاصة أن حجمه كبير مش صغير والعجينة خفيفة قوي وتستاهل كل الحب، كمان بينزل معاها طبق سلطة جرجير عظيمة جدًا جدًا، وكان نفسنا نطلب منها طبق تيك أواي لوحدها كده، محطوط فيها زيت زيتون وقطع جبنه وكمان مش حراقة زي ما معروف عن الجرجير وخلينا نقول أنها معمولة بحب قوي.

دخلنا بقى على المشروبات والحلو، وده كان في زيارة منفصلة في وقت مختلف، وطلبنا مولتن كيك سعرها 70 جنيه، وكان فوقيها آيس كريم، واللي بتشوفوه في السوشيال ميديا لما تفتحوا المولتن كيك وتنزل الشيكولاته السايحة منها، هتجربوه على الحقيقة عندهم وكمان الكواليتي عالي وانبسطنا جدًا من التجربة.

وطلبنا هوت موكا بسعر 60 جنيه، وكانت حلوة وشربناها من غير سكر، وطبعًا جربنا لاتيه أوريجنال وكان سعره 50 جنيه، وليه اللاتيه علشان المكان المميز لو مش بيعمل لاتيه حلو زي اللي شربناه ده يبقى كل حاجة ملهاش لازمة.

تجربتنا بشكل عام عظيمة وعجبنا الديكور الجميل بتاعهم وكمان الفريندلي سيرفس المميزة، ومش عاوزين نقول أنهم أفضل مكان جربناه الفترة الأخيرة ولكن هو في أول قائمة الأفضل، ومبسوطين من تجربتنا ونتمنى أنكم تستمتعوا لما تزوروهم.

تقدروا تعرفوا أكتر عنهم من خلال صفحة الفيسبوك من هنا.

نصيحة 360

ماتنسوش تتصوروا مع ديكور الكريسماس علشان الصور هتبسطكم.

أحسن حاجة

البيتزا وطبق الجرجير.

أسوأ حاجة

مافيش حاجة ماعجبتناش.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح