The Definitive Guide to Living in the Capital , Cairo , Egypt

من خبرتنا بقى لنا كام سنة في تقييم المطاعم، لو حد سألنا نرشح له أفضل مطاعم هندي في القاهرة، مهراني – Maharani لازم هيكون واحد منهم، بدأ في المعادي ومن ساعتها وهو له سمعة وثقل في عالم المطابخ الهندي، مشكلتنا الدائمة معاه كانت أن ديكوراته تقليدية ومحتاج ابتكار، لكن مافيش كلام على جمال أطباقه والأصناف اللي بيقدمها والاحترافية في تحضيرها.

بعد المعادي انتشر أكتر وفتح في التجمع الخامس وكمان بقى في مول داون تاون الشيخ زايد، ولما جه الوقت المناسب قلنا لازم نروح نزوره في الفرع الأخير، في رأينا داون تاون مش المكان المناسب لطبيعة مطعم هندي معروف زي مهراني، بس يمكن نطلع غلطانين.

أول ما دخلنا استقبلنا مدير المكان وكان ذوق جدًا، المطعم مكون من دورين لكن حجمه صغير جدًا وضيق، والترابيزات قريبة من بعض وبالتالي مافيش خصوصية شوية بس حظنا الكويس أن يوم زيارتنا المكان ما كانش زحمة، الدور اللي فوق مخصص للمطبخ والحمامات.

الديكورات للأسف ما لقيناش برضه فيها أي ابتكار، وفيه صور لشخصيات هندية أو أماكن في الهند على الحوائط بس، والتليفزيون مشغل كليبات أغانى هندي من أفلام بوليوود وفيه تليفزيون تاني في آخر المطعم مشغل أفلام مصرية ما حسيناش أن لها علاقة بطبيعة المكان، بس أحلى حاجة دخلتنا في موود الهند جدًا الـ Costumes أو اللبس الهندي اللي عند مدخل المطعم علشان لو حد حابب يلبسه ويتصور به للذكرى.

على طول المنيوهات جات لنا وطلبنا الطبق الأشهر في المطبخ الهندي Butter chicken أو الفراخ بصوص الزبدة (69 جنيه)، وكمان  Chicken Korma أو تشيكن كورما (69 جنيه) وطلبنا برياني أرز بسمتي بالخضار (38 جنيه) والعيش الهندي بالجبنة (22 جنيه)، وسمبوسا لحم (23 جنيه).

بينزل لك على الترابيزة طبقين صوص، الأول صوص تمر هندي والتاني زبادى بالنعناع، دي أول مرة نذوق فيها صوص التمر هندي، وأقل ما يقال أنه رائع، نفس الطعم المزز والمسكر بتاع المشروب، لا وكمان أحلى منه، قوامه تقيل وممكن تحطه على العيش الهندي وكمان صوص الزبادي بالنعناع كان حلو جدًا، العيش المحشي جبنة حلومى -على حسب ما اتقال لنا- كان طعم العيش حلو لكن ما حسيناش بطعم الجبنة خالص جواه.

سمبوسا اللحم عبارة عن رقايق عجينة رفيعة جدًا محشية بلحم الغنم مع شوية بهارات هندية، من المعروف أن لحم الغنم مرتبط بالأكل الهندي ارتباط وثيق، طعم لحم الغنم كان أول مرة نذوقه برضه وكان حلو جدًا، متقطع شرايح رفيعة جدًا وطرية كان نفسنا تكون كميتها أكبر من حلاوتها، اللي تفاجئنا به هو طبق الأرز بالخضار اللي جالنا غلط، جاء بدل منه أرز بالبيض (50 جنيه)، طعم الأرز البسمتى كان حلو ومبهج جدًا لأن الأرز ملون أصفر وأحمر وأخضر مع البيض المقلى المقطع قطع صغيرة، لكن بالنسبة لنا سعر طبق الأرز كان مبالغ فيه!

نخش بقى على الأصناف التقيلة اللي بيقولوا عليها Signature المطبخ الهندي، الفراخ بصوص الزبدة عبارة عن قطع فراخ مطبوخة مع صلصة الطماطم وكريمة وزبدة، الفراخ مقطعة مكعبات وطرية ومتبلة كويس أوى، طعمها كان سبايسي شوية بس بدرجة مقبولة والصوص تقيل وغني، والتشيكن كورما عبارة عن قطع دجاج مع البهارات والصلصة برضه كان طعمها مميز جدًا وتحب تاكل الصوص أكتر من الفراخ نفسها، من الآخر هتحس بمهرجان توابل جوه بقك مبهج جدًا كأنك سافرت الهند ورجعت.

مسك الختام التحلية، طلبنا آيس كريم جوز الهند الطبيعى (22 جنيه) عبارة عن بولة آيس كريم جوز هند طبيعي وبيتقدم في قشرة جوز هند طبيعية برضه حجمها صغير، وبينزل معاها في طبق منفصل جوز هند مع قرع عسل مبشورين، المزج بينهم كان حلو جدًا وطعم الآيس كريم حلو برضه بس ما كانش اختراع بالنسبة لنا. 

بصفة عامة الأكل الهندي لا يعلى عليه في مهراني، مخدوم وطعمه تحفة وطريقة التقديم كويسة، لنا تعليق بس على كميات الأكل الصغيرة جدًا (حتى الأطباق الرئيسية) وبالتالي لما جاء لنا الريسيت بالأسعار بعد إضافة الخدمة والضريبة كانت مفاجأة بالنسبة لنا، بس إحنا فرحانين بالرحلة الصغيرة اللي رحنا فيها الهند ورجعنا خلال زيارتنا للمكان.