The Definitive Guide to Living in the Capital , Cairo , Egypt

مطاعم
هارون الرشيد – Haroun Al Rasheed

هارون الرشيد: مشويات ترجعك للعصر العباسي

  • 48 شارع إيران، الدقي
تم التقييم بواسطة
Mostafa Fathi Abdelfadil
قيم
قيم الآن
هارون الرشيد: مشويات ترجعك للعصر العباسي

كل يوم بتظهر مطاعم جديدة في القاهرة، والكل بيحاول ينافس ويحجز لنفسه مساحة في عقول أهل العاصمة. ولما شوفنا مطعم “هارون الرشيد” من بره قولنا لازم نجربه.

 

 

المكان موجود في شارع إيران في الدقي، والواجهة والديكورات هتخليك تحس فعلًا إنك رجعت لزمن العثمانيين، إضاءة المكان مميزة، حتى يونيفورم الموظفين في المكان عبارة عن زي عثماني وطربوش.

دي حاجة عجبتنا جدًا، لإننا في كايرو 360 بنحب الأفكار المطرقعة.

من الحاجات اللي لفتت نظرنا في المكان ده الخدمة.. نقدر نقول إن مستوى الخدمة راقي جدًا، والموظفين مبتسمين طول الوقت، وبيتعاملوا معاك وكإنك فعلًا “هارون الرشيد” مش مجرد عميل.

 

 

ندخل على المهم! الأكل طبعًا.. طلبنا طبق كفتة مشوية، (سعره 150 جنيه) والحقيقة إن جودة الكفتة كانت هايلة، والكمية كبيرة، ونوع اللحمة مميز، نزل لنا معاه طبق أرز بسمتي وبطاطس. والأرز كان مستوي حلو وتوابله مظبوطة.. والبطاطس كان لونها ذهبي ومقرمشة.

 

 

طلبنا كمان ميكس جريل، وده الموظف رشحه لنا وقال إنه من أكلات المطعم المميزة، وفعلًا عجبنا جدًا، هو واضح إن المكان بيهتم بجودة اللحوم وبيختارها على أعلى مستوى.

الطبق عبارة عن قطعتين شيش طاووق مع صابع كفتة مع قطعة لحم ضاني، وبينزل معاه طبق أرز بسمتي، (سعره 115 جنيه).

من السلاطات اختارنا طبق سلاطة طحينة (سعره 14جنيه)، وطبق سلاطة خضرة (سعره  10 جنيه) ونقدر نقول إن السلاطات في هارون الرشيد عادية جدًا ومافيهاش حاجة مميزة.

 

 

المطعم فيه قسم للحلويات الشرقية، فقرننا نطلب طبق بسبوسة (سعره 25 جنيه) وكانت جودتها عالية جدًا ومعمولة بمزاج شديد.

أما الكنافة (سعرها 25 جنيه) فكانت مش مستوية حلو، وناشفة شوية وماقدرناش نكملها للنهاية وكانت كمان تقيلة قوي.

في المجمل تجربتنا في هارون الرشيد كانت لطيفة، والمطعم مختلف وبنتوقع له نجاح كبير في عالم مطاعم القاهرة.

نصيحة 360

لو بتحبوا التصوير المكان بيعد لوكيشن مميز

أحسن حاجة

المشويات تجنن

أسوأ حاجة

الكنافة كانت ناشفة والسلاطات مش مميزة.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح