The Definitive Guide to Living in the Capital , Cairo , Egypt

بطبيعة الحال إحنا كمحررين كايرو 360 بنحب نجرب كل جديد، وماقدرناش نفضل في مكاننا لما عرفنا إن فيه مطعم أكل فيتنامي في القاهرة، وكان لازم نروح ونجربه. لما وصلنا المطعم لقينا الطبيعة الساحرة لفيتنام بتحاول تظهر من خلال صور على الحيطة ومراوح عليها رسومات ورود، وعرفنا من خلال الموظف في المطعم إن المكان بيتعاون مع السفارة الفيتنامية.

المكان بسيط ما بين ترابيزات على الأرض جنب الشباك وترابيزات عادية عليهم مفرش بسيط عادي، والمنيو كان متنوع ما بين أنواع النودلز اللي شبه النودلز الصيني بالفراخ واللحمة أو خضار، وأنواع للشوربة والسبرينج رولز والبيتزا الفيتنامي والحلو اللي كان نوعين بس، كيكة موز أو موز مشوي.

طلبنا من المنيو شوربة “Pho Ga” بـ 30 جنيه، ودي عبارة عن شوربة بالنودلز اللي من الرز مع شرائح بصل ني وخضار أخضر شبه الفاصوليا برضه ني وقطع دجاج مسلوقة، طعم المرقة نفسه كان حلو جدًا لكن النودلز نفسها مكانش لها طعم، وماحبيناش فكرة إن الخضار ني خاصة البصل، بس ده جزء من الثقافة الفيتنامية، فلو أنت زينا ننصحك تدور على شوربة تانية عادية.

كمان طلبنا نولدز محمرة بالدجاج بـ 28 جنيه، وبرغم إنها جت قبل الشوربة وبرغم إن حجم الطبق كان صغير حبة، إلا إننا حسينا أنها مليانة زيت وقطع الدجاج فيها كانت تقريبًا محروقة، من كتر التقليب في الطاسة وبرغم إن صاحب المكان قعد يشرح لنا أنواع الزيوت والصويا صوص والحاجات المستخدمة وبرغم إن طعمها خفيف لكن برضه ماكنتش أكلتنا المفضلة زي الطلب اللي جاي.

بيتزا فيتنامي نباتية بـ 25 جنيه، أجمل اختراع جربناه في المكان ده، هو شبه الكريب بس مقرمش ومليان مشروم وبامبو شوت.

وصحيح إن بعض قطع المشروم كانت متحمرة زيادة عن اللزوم، لكن الطعم اللي ذوقناه لا يمكن ننساه وأكيد هنروح تاني علشان نجربه.

مسك الختام بقى القهوة الفيتنامي بـ 18 جنيه، ودي Iced coffee باللبن مش بتسهر وطعمها مختلف عن أي قهوة هتجربوها، بس هي مشروب صيفي أكتر من شتوي ونسبة التلج فيها كانت أكبر من القهوة نفسها.

تجربتنا في هو تشي كانت مميزة وأكيد هنروح تاني علشان نجرب أكل مختلف وصحي ولذيذ، بيحاول يحسن من صحة المصريين بأنه يعرفهم على وجبات صحية ومميزة، خاصة إن الخدمة ممتازة والأسعار معقولة جدًا.