The Definitive Guide to Living in the Capital , Cairo , Egypt

شوارع مصر معروفة بحبها للأكل، والدليل انتشار محلات وعربيات الأكل في شوارعنا، ومن أهم الأكلات في مصر هي أكلات الشارع المشهورة زي “الكبدة والسجق”، وهي من الأكلات اللي لا غنى عنها، وفيه مشاهير متخصصين في الأكلات دي ولهم وصفات خاصة. مؤخرًا سمعنا عن مطعم “يوكل” واللي له 3 فروع في القاهرة، فقررنا نروح نجربه وننقل لكم تجربة فريقنا داخل أغلى مطعم كبدة وسجق في القاهرة.

المكان للأسف كان صعب نوصله لأنه في ممر جانبي في الزمالك، ومافيش يافطة بره بتدل عليه. لكن هتقدروا توصلوا في النهاية. المطعم محندق ولذيذ كده، والكراسي عبارة عن صناديق كولا وترابيزات الأكل هي أرفف من الخشب نعتقد إنه معمول لها إعادة تدوير، ودي حاجة مميزة، وكمان أول ما تدخلوا المكان هتلاقوا يافطة على اليمين لازم تقروها كويس لأن رغم انها فكاهية إلا أنها بتوضح لكم قواعد المحل اللي بيهتم جدًا بالاحترام المتبادل، وإن الزبون مش دائمًا على حق! فيه ناس ممكن تتقبل الكلام ده وتعتبره فكر جديد وظريف، والبعض الآخر هيشوف إن المكان مش مفروض يقول كدة!

دخلنا بقى على الأكل، والمنيو بسيط وسهل وخفيف وقررنا نطلب وجبة اسمها “كبوت” ودي سعرها 67.5 جنيه، وهي مكونة من 5 سندوتشات “سجق – كبدة – كفتة – سكلنس”، ومعاهم حاجة ساقعة، ولكن للأسف فوجئنا أن السندوتشات صغيرة جدًا، ونقدر نقول أن الرغيف عندهم يساوي “ربع” -أيوة ربع رغيف- وطبعًا لقينا أن الأكل مش هيكفينا فطلبنا زيادة سندوتش سجق مشوي جريل وسندوتش كفتة مشوية وسعر الواحد 12.5 جنيه، وهما عندهم صوصات لطيفة جوا المحل ببلاش، لكن لو تيك أواي هتدفع عليها فلوس.

بخصوص الطعم بقى فخلينا نقول أن السجق كان أفضل حاجة، ولكن فيه أحسن منه في أماكن تانية، أما الكبدة فكانت عادية زي أي سندوتش كبدة هتاكله على أي عربية، والبطاطس جت لنا باكت مش ساندوتش وكانت مقرمشة ولكن البهارات قليلة.

أما الكفتة بقى فهي محتاجة إعادة تفكير في الخلطة وطريقة عملها لأنها مش أحسن حاجة، لكن نقدر نقول عليها شغالة!

وأخيرًا، جربنا السكلنس قبل ما نشرب الحاجة الساقعة المشبرة وكان عبارة عن قشطة وحلاوة بننصح أن محدش يجربهم لو هما على طول كده، أو يمكن يكون حظنا هو اللي جابنا في يوم القشطة فيه مالهاش طعم، والحلاوة مش أحسن نوع مقبول، على العموم هنبقى نجرب الساندوتش ده تاني في يوم تاني.

تجربتنا بشكل عام مش أفضل حاجة، لكن أكيد المكان هياخد بملاحظات العملاء وهيحسن الجودة، خاصة أن السعر مش رخيص بالنسبة للحجم، وإن كان حجم السندوتشات دي ممكن يشبعوا أفراد عادية مش أكيلة.

تقدروا تتعرفوا أكتر عن مطعم يوكل من خلال صفحة الفيسبوك من هنا.