The Definitive Guide to Living in the Capital , Cairo , Egypt

وسط عدد رهيب من مطاعم البرجر اللي احتلت القاهرة مؤخرًا، ناقص بس إننا نشوف في مصر البرجر العملاق اللي طلع في فيلم الكرتونCloudy with the Chance of Meatballs  وغالبًا الناس هتاكله برضه.

واضح أن موضة البرجر مكملة معانا شوية حلوين، بس إحنا حبينا نبعد شوية عن قطع البرجر الطرية اللذيذة اللي بيستهلكها أهل القاهرة، ونشوف مطاعم قدرت تقدم أفكار جديدة وتشقلب الدنيا، زي البرجر بالشوكولاتة، وحاجة ثانية صعب تصدقوها وهي "برجر بالمكرونة والجبنة"؛ تخيلوا! عمومًا، مافيش مفر من البرجر.

1. ستافد شوكليت برجر من برو أند تشو

وصل وصل وصل، برو أند تشو صاحب الأصول الإسكندرانية وصل القاهرة، وهو محل شوكولاتة وكافيه مشهور بحلوياته اللذيذة، ده غير أنه بيعمل البرجر بصوص شوكولاتة لذيذ وعليه زبدة فول سوداني.

2. ناتشو برجر من ويليز كيتشين

Photo courtesy of Willy's Kitchen on Facebook

قطعة برجر طرية عليها بيف بيكون مدخن وهالبينو وبصل مسكر وتشيلي صوص، بس الابتكار هنا أنهم مش بيستخدموا عيش تورتيلا عادي، دول بيعملوا عيش تورتيلا مقلي. أي حاجة فيها كلمة "مقلي" عمومًا بتكون أحلى بشكل تلقائي.

3. كريسبي برجر من مانهاتن برجر

شوفوا من الآخر، الكريسبي برجر من مانهاتن عبارة عن قطعة برجر مشوية وعليها صوص باربيكيو ومشروم مشوي وجبنة موتزاريلا وعليهم سمسم، وبعد كل ده بيلفوه في عيش تورتيلا مقلي ويقدموه على شكل فطيرة. اعتقد كفاية عليكم كده!

4. كراميل برجر من صوفياز جاردن

ونحب نهنئ الفائز معانا بأوسكار أحسن مؤثرات بصرية وهو… صوفياز جاردن! دور البطولة كانت للشوكليت أند ناتس آيس كريم في دور "قطعة البرجر"، والكوكيز بالزبدة في دور "قطع الجبنة" وكيكة الكراميل الاسفنجية في دور "العيش". الحقيقة إن الكراميل برجر من أحلى الحلويات المتنكرة في صورة برجر. ملعوبة يا صوفياز جاردن، فعلًا ملعوبة.

5. تريو SGF من باك فاير

طبعًا كلنا فرحنا من اجتماع باتمان وسوبرمان ووندر وومان في فيلم قدر يبهرنا، بس خلينا نتكلم بصراحة، التريو برجر من باك فاير أحلى. قطعة البرجر المشوية ومحشية جبنة وهالبينو مقليين صح الصح، وعليهم صوص مارينارا وجبنة بارميزان؛ بصراحة اللي عمل البرجر ده يستاهل نيشان.

6. برجر تاور من عالماشي

لو أنت من عشاق البرجر، يبقى احتمال كبير تكون جرّبت برجر تاور عالماشي اللي بيعمل البرجر تاور في العيش الشامي الصعيدي الجميل، وأكيد هيكون مختلف عن أي حاجة ثانية جرّبتها. ننصحكم تجربوه في أقرب وقت.

7. سالمون برجر من رافيش

قطعة سالمون عليها خس وصوص واسيناسا وشرائح أفوكادو ومانجو وحلقات بصل مقلية، ونقدر تقول السالمون برجر من رافيش عبارة عن قطعة سوشي كبيرة طعمها لذيذ، وكل اللي ناقصها شوية أرز حلوين.

8. موروكان برجر من برجر فاكتوري

واحد من أكثر الأفكار المطرقعة اللي شوفناها على ساحة البرجر القاهرية، وهو خلطة غريبة من القرفة مع القراصية وصوص بلح وجبنة بيضاء مع عين الجمل. لكن لو أنت من عشاق المطبخ المغربي، هتكون عارف أن مافيش زي المغاربة في تنفيذ الطعم المسكر والحادق مع بعض. اعتقد ممكن نقول ريح أنت شوية يا برجر يا تقليدي.

9. مايتي باسترد من بوتشرز برجر

Photo courtesy of Butcher's Burger on Facebook

لو عمرك حلمت تعمل تحدي الإنسان ضد الأكل وشايف أنك تقدر تأكل كيلو كامل من اللحم ومعاه 8 شرائح من الجبنة الشيدر، وتشيلي كون كارني وبصل مقرمش وبصل مقلي ومايونيز مدخّن، يبقى أكيد لازم تجرب المايتي باسترد من بوتشرز برجر ويستحسن تسجل رقم الدكتور احتياطي، ده كيلو لحمة يا أستاذي مش هزار!

10. ماك أند تشيز من باك يارد

Photo courtesy of the Backyard on Facebook

محتار تأكل برجر ولا طبق ماك أند تشيز محترم؟ ليه ما تأكلش الأثنين في وقت واحد؟ باك يارد بيقدم ماك أند تشيز برجر المكون من قطعة لحم وزنها 160 جرام وعليها ماك أند تشيز لذيذة، وهتشعر معاها أنك بتأكل برجر من مطعم أمريكاني رائع.

11. بيتزا برجر من بالتازار

اسمعوا النكتة دي: مين أحلى، البيتزا ولا البرجر؟ بيتزا برجر؛ مش حلوة صح؟ أيوه مش حلوة، إحنا برضه مش بنضحك. عمومًا، البيتزا برجر تعتبر أحلى حاجة حصلت في مجال الفاست فوود من ساعة ما واحد عبقري قرر يجرب البيبروني والأناناس مع بعض.