The Definitive Guide to Living in the Capital , Cairo , Egypt

واضح إن موضة البرجر راحت عليها، ودلوقتى المطاعم المتخصصة في البيتزا الإيطالي الأصلية احتلت مطاعم القاهرة، و”900 ديجريز – 900 Degrees” هو أجدد المنضمين للمنافسة الحامية.

المطعم موجود في مول داون تاون القاهرة الجديدة، وبيتميز بديكوراته البسيطة المبهجة وأجواءه اللطيفة، ودي عوامل صعب تتجمع في مطعم جوه مول. الفضل في الكلام ده يرجع للمسات الخشب في الديكور والكراسي والكنب بلونهم الأصفر، ومعاهم مطبخ البيتزا المكشوف والفرن الخشب الأحمر والسبورة المتعلقة فوقه.

طيب، خلونا نتكلم شوية عن الأكل هناك. بدايتنا كانت مع Fried Bocconcini (سعره 38 جنيه) وتشيكن وينجز (45 جنيه) نفتح بيهم شهيتنا. بيتقدم معاهم صوص مارينارا طازة فيه نكهة ثوم، والملاحظ في جبنة bocconcini طعمها المسكر شوية وقوامها المطاطي الغني، بس تعليقنا الوحيد عليهاإن البقسماط المقلي كان عايز تتبيلة تعمل نكهة مميزة.

أما الوينجز الطرية بطعمها المدخنفبيتقدم معاها صوص بلو تشيز، وبيدخلوا الفرن الأول وبعدها بيقلوهم في الزيت. الوينجز برضه كانت مشكلتها في التتبيلة، وصوص البافالو – رغم طعمه المزز الجميل–خلى العجينة مزيتة.

وصلنا دلوقتي لمرحلة الوحش: البيتزا. تخصص 900 ديجريز الأساسي هو البيتزا النابولية الأصل، وإحنا كنا متحمسين جدًا نفهم ليه ناس كتير بيقولوا إنها هي بيتزا نابولي هي الأصل والباقي تقليد..

جربنا بيتزا Capricciosa (سعرها 85 جنيه) – المختلفة عن Capriciossa– وعليها إضافة بيبيروني (10 جنيه). بغض النظر عن صلصة الطماطم ونكهة الثوم الزيادة فيها، البيتزا كان عليها كمية محترمة من المشروم الطازة وزيتون وبيبيروني وتوابل تحفة، مع جبنة موتزاريلا دي بوفالا لذيذة ورشة زيت تروفل، والعجينة نفسها كانت معمولة بأطراف منفوخة روعة وفي النص كانت مقرمشة شوية وقوامها هايل. نقدر نقول بكل ثقة إنها نجحت في الامتحان بامتياز.

جربنا كمان جارليك شريمب باستا (98 جنيه)، عبارة عن فتوتشيني باستا مستوية كويس وفيها جمبري مع زيت زيتون وثوم وتوابل طازة وشوية كريمة وجبنة بارميزان. رغم إن المكونات مختلفة ومتنوعة، الطبق متحسش فيه نكهة مميزة ومفيش وجود لطعم الثوم. بصراحة كنا مستنيين التوابل تعمل طعم أقوى تعوض غياب أي صوص.

مسك الختام كان نوتيلا بيتزا رينج (60 جنيه) نحلّي بيه. نفس العجينة بتاعت البيتزا بس معمولة على شكل حلقة محشية كمية نوتيلا محترمة ومعاها كريمة مخفوقة وصوص توت مزز وشرايح موز وكيوي وفراولة وعليهم شوية صوص توت زيادة.الرينج كانت مستوية كويس زي البيتزا، وطبعًا مفيش حاجة في الكىن فيها نوتيلا وفاكهة طازة يتقال عليها أي كلام وحش.

على العموم، تجربتنا مع 900 ديجريز لها مميزاتها وعيوبها.اتبسطنا جدًا الاجواء اللطيفة والبيتزا عندهم هايلة، بس المقبلات والباستا عايزين شوية شغل. ممكن نعذرهم عشان هم لسه في فترة الافتتاح التجريبي، ومش هتكون مفاجئة إن كل أطباقهم توصل لأعلى مستوى خلال الأسابيع والشهور الجاية.