The Definitive Guide to Living in the Capital , Cairo , Egypt

مطاعم
The Kiosk – ذا كيوسك

The Kiosk: برجر روعة في هليوبوليس

  • 42 شارع عبد المنعم حافظ - ألماظة , مصر الجديدة مصر الجديدة,القاهرة.
  • برجر
تم التقييم بواسطة
Omar Yousry
قيم
قيم الآن
The Kiosk: برجر روعة في هليوبوليس

النهارده موضوعنا عن “ذا كيوسك – The Kiosk“، وهو واحد من أجدد مطاعم البرجر في القاهرة المستخبية في منطقة ألماظة في هليوبوليس وقريب جدًا من تيفولي دوم وجنب مطعم شاتز – Schatz.

ذا كيوسك يتميز بتصميمات مطرقعة شوية من النجف وصور الجرائد العتيقة لغاية الحمام نفسه اللي بـ يغطيه صور Justice League اللي هـ تبهر كل عشاق الكوميكس.

أول ما وصلنا لترابيزتنا، رحبوا بنا وقدموا لنا منيو ورق وقلم، ودي واحدة من أفكار ذا كيوسك المطرقعة وهي أنك بـ تعمل دوائر على اختياراتك بدل ما تطلبها.

مافيش عند ذا كيوسك أي أطباق مقبلات، وبالتالي دخلنا على البرجر وطلبنا مونسترس Monstrous بـ (48 جنيه) قطعة برجر 200 جرام عليها خس وطماطم وشرائح بصل مقرمشة وشريحة بيكون وبطاطا مشوية ومشروم وجبن سايح، والمفروض بـ يكون معاه بيض عيون بس إحنا طلبنا إلغائها، مع واحد رابشر Rapture بـ (47 جنيه) وده برضه قطعة برجر 200 جرام محشية جبن شيدر وقطع بيف بيكون وعليها خس كابوتشى وبصل وصوص جبنة سايحة وطلبنا معاه بطاطس موتشاتشو المحمرة (20 جنيه).

نبدأ كلامنا عن المونسترس ونقول أن اللحم كان مستوي well-done –زي ما طلبنا– بس قدر يحتفظ بعصاريته بشكل كويس، والجبن السايح مع البصل والنكهات قدروا يضيفوا طعم مميز للساندويتش، كل اللي فات كوم والعيش نفسه كوم ثاني خالص، بصراحة العيش الطازج كان تحفة بقوامه الطري المميز وطعمه اللذيذ.

أما الرابشر فوصل والجبن خارج من كل حته فيه، ومع أول قضمة انبهرنا من روعة النكهات المميزة وقطعة اللحم الطري، ومن ثاني لازم نجيب سيرة العيش الرائع، وطبعًا الجبن الخارج من كل مكان.

نقدر نقول وضميرنا مستريح أن بطاطس الموتشاتشو كانت أجمد حاجة ممكن نطلبها مع البرجر؛ عليها قطع بيكون وجبن سايح رائع وصوص طعمه مزز نوعًا ما بس أضاف للجبن نكهة قوية.

خلصت زيارتنا مع طبق أخير رائع وهو ذا هيفن سبونج The Heaven Sponge بـ (35 جنيه)، عبارة عن فرينش توست مسكّر محطوط في طاسة وعليه بولة آيس كريم فانيليا كبيرة ومتغرّق صوص بيبسي وكراميل، الفرينش توست كان مقرمش من بره وطري أسفنجي من جوه، وكمان بعد ما شرب كل الصوصات طعمه كان مسكّر، في الأول ما عرفناش ندخل في الآيس كريم، لكن بعد ما ساح شوية استمتعنا بكل قطعة من البولة اللذيذة؛ ودي كانت أحسن نهاية ليوم لطيف وأكلة لذيذة.

بشكل عام، تجربتنا في ذا كيوسك كانت هايلة، يوم جميل مع ساندويتشين برجر من العيار الثقيل أكيد هـ يخلونا نرجع في زيارات ثانية قريب.

نصيحة 360

اطلب برجرك Well-done، لو طلبته Medium بـ يكون أقرب لـ Rare شوية، إلا لو كنت بـ تحبه كده.

أحسن حاجة

البرجر تحفة، وكمان الأسعار شاملة الخدمة والضريبة، فاللي موجود في المنيو هو اللي هـ تدفعه.

أسوأ حاجة

القعدة مش مريحة نوعًا ما وصعب تلاقي ركنة.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح