The Definitive Guide to Living in the Capital , Cairo , Egypt

فيه مجموعة من الباحثين نقبوا ورا الوثائق التاريخية القديمة في الوادي الجديد واكتشفوا مجموعة مذهلة تاريخها بيرجع لـ3500 سنة، ومنها 7 مصاحف وإنجيل ووثائق قديمة من العصر المملوكي، ووثائق بيع وشراء أراضي وزراعات قديمة جدًا.

بداية الحدوتة لما الدكتور علي رمضان، مدرس التاريخ في جامعة الأزهر، اكتشف أرشيف لتاريخ مدينة الواحات في الوادي الجديد، ومن هنا قرر مع الدكتور أحمد عبد الغني باحث الآثار في جامعة سوهاج إنهم يشكلوا فريق عمل بحثي علشان يعملوا موسوعة تاريخية عن تاريخ الواحات.

وزي ما قال رمضان، في تصريحات لموقع الجمهورية، انهم التقوا مع معمرين وشخصيات مهتمة بالتاريخ في الوادي الجديد، وتوصلوا لمجموعة وثائق مهمة جدًا في منزل عائلة “المأذون”، اللي بتعتبر من أقدم العائلات، منها 7 مصاحف مكتوبة بخط اليد خاصة بأجداد عائلة المأذون مكتوب عليها أسماؤهم، وبترجع للقرن الـ18 والـ19، وكمان نسخة للإنجيل مترجمة إلي اللغة العربية، وتاريخ طباعتها كان في  عام 1946.

دا غير أرشيف كامل للمعاملات القديمة لأكثر من قرية ووثائق متعلقة بالأنشطة الزراعية زي استئجار وبيع الأراضي وحقوق المياه وعقود المزراعين، وكمان وثائق خاصة بصيانة وترميم ينابيع المياه، وكشوف عن تكاليف آبار المياه من القرن الـ18، و900 وثيقة زواج وطلاق، من بينها طلاق “الأخرس” وإزاي بيقع، وده عن طريق أنه يمسك ورقة أو حطبة ويقسمها نصين، وبكده يكون رسميًا طلق لأول أو ثاني مرة، لكن المرة التالتة لازم يقسم الورقة أو الحطبة لـ3 قطع.

كمان اكتشف فريق العمل البحثي كشوف خاصة بالوفيات بترجع إلي أواخر القرن الـ18، ومن ضمنها كشف بيقول إن سبب وفاة شخص ما كانت الحسد بسبب ذكائه وحسن صوته.