دليلك من القاهرة لأسوان!
Kate Dannies
أول ما بـ تيجي سيرة أسوان قدام أي قاهري بـ ييجي في باله على طول صورة
الآثار اللي هناك وطيبة أهلها والأجازة الشتوية اللي عمره ماهـ ينساها على ضفاف
النيل أو في النوبة. المدينة الأصيلة هي معقل الثقافة النوبية النابضة بالحياة بـ
تفاصيلها البسيطة وعيشتها الهادية. ده غير أنه أشهر مكان تِشتي فيه في مصر وتستمتع
فيه بالشمس بعيد عن الزحمة والدوشة.
إزاي تروح هناك؟
أشهر حاجة هي قطار الليل – أو زي ما بـ يسموه “قطر النوم” – من
محطة مصر، الغرفة المجهزة للنوم في القطار بـ550 جنيه، وممكن تخفض التكاليف وتاخد
كرسي درجة أولى بـ250 جنيه بس. وممكن توفر وقت ولخبطة القطارات وتاخد رحلة من
رحلات «مصر للطيران» من مطار القاهرة هـ تكلفك 800 جنيه وتوصل هناك بعد 45 دقيقة
بس ويبقى عندك وقت أطول تستكشف فيه البلد بدل ما يضيع في المواصلات.
تقعد فين؟
أسوان فيها فنادق بكل الأسعار وبكل المستويات. فيه فندق «كتاراكت – Cataract» اللي إتبنى سنة 1899 بس هو مقفول عشان بـ يتجدد وهـ
يفتح سبتمبر 2011. والفندق ده من أجمل الفنادق في مصر كلها، بكل شبر فيه معمول
عشان يستضيف ملوك وأمراء، وكل حاجة فيه بـ تحكي عن زمن جميل. فيه كمان فندق «موﭭنبيك
أسوان» الـ5 نجوم وهو لسة فاتح قريب. وفيه فنادق 4 نجوم زي «إيبروتل» و«جزيرة
إيزيس بيراميزا»، وفنادق 3 نجوم أسعارها هايلة زي «إيزيس الكورنيش» اللي في قلب
المدينة أو «فندق سارة» اللي موجود على جبل عالي ممكن تشوف منه منظر رائع للنيل من
فوق ومزود بحمام سباحة.
الأكل؟
الأكل الجورميه مش كتير في أسوان إلا في الفنادق طبعاً، فيه مطعم هندي
وأوروبي في «موﭭنبيك» أسمه «The Orangerie Restaurant» وده مكان حلو للأكل ولسهرة أنيقة. محلات الكباب
والكفتة والمكرونات والسلاطات الشرقية مالية البلد وأسعارها مريحة جداً للجيب. أما
مطعم «الشيف خليل» القريب من السوق في وسط المدينة، فهو مكان سياحي والإختيارات في المنيو بتاعه مميزة عن أي مطعم تاني. ولو كان ليك الحظ انك تروحه جرب
الكركديه الأسواني عنده، وإلا يبقى كأنك ماروحتش أسوان. وجرب المشروبات اللي في
مطعم «البيت النوبي» وإتفرج على منظر النيل من جوة المحل. إختيار تاني للأكل إنك
تعمل غدوة على فلوكة في النيل سواء كان الفندق بتاعك ممكن يوفرلك ده أو تروح
المرسى تأجر فلوكة وتكون جايب معاك أكل.
حاجات ممكن تعملها
أكيد زيارة المعالم السياحية أهم حاجة ممكن تعملها، ومن المعالم دي: جزيرة
فيلة، معابد كلابشة، دير سانت سيمون، ضريح أغا خان، ولو وقتك يسمح إعمل زيارة
لآثار أبو سمبل. معالم أسوان الحديثة كمان تستحق الزيارة، روح «المتحف النوبي»
اللي بـ يعرض فنون ومعمار نوبي معاصر؛ المتحف بـ يعرض معلومات مهمة جداً عن تاريخ
وحضارة المدينة وتأثير بناء السد العالي على ثقافتهم المعاصرة.
عشان كدة لازم تعمل زيارة للسد العالي أحد أهم معالم المدينة ورمز لفترة
حكم الرئيس جمال عبد الناصر، واللي أثار جدل عالمي لما إبتدى المشروع يتنفذ. عشان
التسوق الضروري تقدر تروح سوق المدينة اللي فيه كل حاجة، من أول الهدايا التذكارية
لحد التوابل اللي المدينة مشهورة بيها والكركديه المجفف والملابس الملونة المطرزة.
مساحة المدينة الصغيرة هـ تخليك تتفرج عليها كلها في وقت قصير، فـ خللي
شوية وقت تسترخي فيه على شيزلونج قدام النيل أو حتى على حمام السباحة في الفندق.
وقت للإسترخاء وآثار عظيمة حواليك وثقافة حضارية كل ده بـ يخلي أسوان مكان
ساحر.
أسوان قِبلة للمصريين قبل الأجانب، لو كنت متعود تروح الساحل الشمالي أو
العين السخنة في الويك إند، إكسر القاعدة مرة وإنزل آخر الصعيد وقضي أجازة في
أسوان.
مقترح
الحياة في كايرو
تقرير.. مصر الثانية إفريقيًا من حيث عدد الأثرياء والقاهرة فيها 7200 مليونير
ترتيب مصر من حيث الأثرياء ثروات مصر +4
صحة ولياقة
