The Definitive Guide to Living in the Capital , Cairo , Egypt

الصورة الرئيسية: Hoba offendum

القاهرة مدينة السحر والجمال، والأسباب كتيرة، منها: آثارها، ومبانيها، وشوارعها التاريخية، وناسها اللي وشوشهم مليانة طيبة وأصالة وحب، لكن فيه سبب مهم نقدر نقول إنه بيزود سحر العاصمة وجمالها.. وهو وجود مبنى مميز على أرضها، وبالتحديد في حي مصر الجديدة. بنتكلم عن قصر البارون، القصر الوحيد في العالم اللي مابتغيبش عنه الشمس.

تعالوا نتعرف على القصر ده من خلال 11 معلومة فيهم الخلاصة:

 

1 – سبب تسمية القصر باسم “قصر البارون” هو إن صاحبه هو المليونير البلجيكي البارون “إدوارد إمبان”، اللي وصل لمصر من الهند في نهاية القرن التاسع عشر، بعد شهور قليلة من افتتاح قناة السويس.

2 – قام البارون إمبان بتشييد القصر ده سنة 1911، في قلب منطقة مصر الجديدة بالقاهرة، وتحديدًا في شارع العروبة على الطريق الرئيسي المؤدي لمطار القاهرة الدولي.

3 – “إدوارد إمبان” حصل على لقب “بارون” من ملك فرنسا، تقديرًا لمجهوداته في إنشاء مترو باريس، وده بسبب إن “إمبان” كان مهندس متميز.

4 – مواهب “إدوارد إمبان” كانت متعددة. إلى جانب تميزه في الاقتصاد والهندسة، كان بيعشق السفر والترحال باستمرار، وعلشان كده سافر بأمواله الكتيرة لمعظم بلدان العالم، وسبب وجوده في بلاد السحر والجمال “الهند”، عشق المليونير البلجيكي الشرق، وبالنسبة له كانت مصر في مكانة خاصة.

5 – عشق “إمبان” لمصر خلاه يتخذ قرار مصيري بالبقاء فيها لحد وفاته، وطلب “إمبان” في وصيته أنه يدفن تحت تراب مصر حتى لو مات خارجها أثناء رحلاته.

6 – في حياته في مصر، بدأ “إمبان” يدور لنفسه عن مكان يعيش فيه ويكون قصره، ومن هنا ظهر “قصر البارون” اللي أصبح الأوحد من نوعه في العالم لحد النهارده.

7 – اختيار البارون لمكان القصر، وسط الصحراء– في الوقت ده – كان اختيار غريب ولغز ماحدش لاقي له تفسير لحد النهارده.

8 – كانت منطقة مصر الجديدة في الوقت ده مجرد صحراء جرداء، لكن “إمبان” عرض في الفترة دي على الحكومة المصرية فكرة إنشاء حي في الصحراء شرق القاهرة واختار له اسم “هليوبوليس” أي مدينة الشمس.

9 – “إمبان” كمان فكر في إنشاء خط للمترو في المنطقة، علشان يجذب أكبر عدد من المصريين  للسكن في المكان الجديد، وكلف المهندس البلجيكي “أندريه برشلو” اللي كان بيشتغل في الوقت ده مع شركة مترو باريس بإنشاء خط مترو يربط الحي أو المدينة الجديدة بالقاهرة.

10 – القصر الإسطوري صُمم بحيث إنه ما تغيبش عنه الشمس، وبالفعل بتدخل الشمس كل غرف القصر وممراته، واستلهم البارون تصميم القصر ده من معبد “أنكور وات” في كمبوديا ومعابد “أوريسا” الهندوسية، وقام بتصميم القصر المعماري الفرنسي ألكسندر مارسيل، وزخرفه جورج لويس كلود، واكتمل البناء سنة 1911.

11 – بدأ “إمبان” في إقامة البيوت في الحي الجديد على الطراز البلجيكي الكلاسيكي بالإضافة إلى مساحات كبيرة بتضم حدائق رائعة، وبني فندق ضخم هو فندق هليوبوليس القديم اللي انضم مؤخرًا لقصور الرئاسة بمصر.

 

حقيقي لو مازرتش قصر البارون في حياتك، يبقى فايتك كتير.. مستني إيه؟