The Definitive Guide to Living in the Capital , Cairo , Egypt

عمرك زرت جنوب شرق آسيا؟ توقف سريع فى الخليج هو الحاجة
الوحيدة اللى بينك وبين أكلة تايلاندى، وتسوق عظيم، وشواطئ جميلة. بتذكرة ذهاب
وعودة لبانكوك بسعر من 3000 لـ 3600
جنيه، يفضل سؤال واحد: أنت مستنى إيه؟

طيران الاتحاد -خطوط الطيران الرسمية للإمارات العربية المتحدة-  بـ
يعرض رحلات إلى بانكوك بترانزيت فى أبو ظبى بأسعار من 3000 إلى 3600
جنيه. الكراسى كانت واسعة والوجبات كانت مُرضية. أول ما توصل مطار بانكوك
الدولى، دوّر على قطار المطار علشان
تروح وسط البلد بدل التاكسى الغالى جدًا. إحنا بـ نقترح عليك تنزل فى فندق بارك
بلازا Park Plaza Hotel (حوالى 500
جنيه فى الليلة) وده مكانه جنب محطة مترو أسوكا Asoka. بالرغم أنه أغلى
شوية من فنادق تايلاند المعتادة لكن
مكانه ممتاز والسراير مريحة بشكل مش طبيعى هـ تحسسك قد إيه المكان يستحق.

علشان تشوف عظمة بانكوك لازم تروح فى أيام الويك إند.
وأحسن طريقة علشان تبدأ بها يوم السبت أو الأحد هى رحلة لشاتوتشاك ويك إند ماركت Chatuchak Weekend Market (من  9 صباحًا إلى  6مساءً السبت والأحد)، وده موجود جنب محطة مترو مو تشيت –Mo
Chit- تروح بالقطار المعلق (10 جنيه). البائعين كانوا لُطاف،
الأسعار معقولة جدًا، والفصال كان بـ يحصل 
فى جو من البهجة. رائحة البخور بـ تخلى الزوار يروحوا لمحلات زى محلات بـ
تبيع أحذية الكونفيرس، التي شيرتات المطبوعة، وأنواع ثانية كثير من التذكارات.
لازم تدوّر على محلات أكواب الأيس كوفى اللي بـ تمتلكها عائلات. الحرارة الشديدة،
الرطوبة، وإحساس العطش اللى مافيش منه مفر زودت متعة شرب الآيس كوفى (6 جنيه). ده
كان من غير شك أحلى آيس كوفى شربناه فى حياتنا.

علشان الغداء، روح لوسط السوق علشان تجيب وجبة رخيصة من
البائعين الكثير اللى واقفين. اللحم المشوي على أسياخ والمأكولات البحرية اختيار
لذيذ، لكن أحسن حاجة علشان تستفيد بالفلوس اللى هـ تدفعها يبقى أكيد تختار الأرز أو شوربة الشعرية -النودلز- بالبيض مع
اختيارك من اللحوم أو الفراخ (10 جنيه). الشاى المثلج على الطريقة التايلاندية،
بالرغم من لونه البرتقالى الغريب شوية لكن كان مهم علشان يقلل قوة الشطة اللى فى
معظم الأكل. لو لسه عندك مكان للحلو، يبقى أيس كريم بجوز الهند (6 جنيه) اللى بـ يُقدم
مع قشور جوز الهند وده موجود قريب من بائعي وجبة الغداء. مع إضافة السودانى
المطحون على الوش، الحلويات الدسمة الباردة بـ تساعدك ولو لفترة أنك تهرب من
الحرارة والرطوبة.

بعد كده، لازم تروح لوات بو Wat Pho (الدخول بـ 12 جنيه)، وده معبد
بوذى من أقدم المعابد اللى مُسجّل فيها التعليمات اللى بـ تشرح فن المساج. من
الواضح أن المساج التايلاندى المحبوب كان على وشك الانقراض قبل ما الدولة تتدخل
وتفتح مدارس للمساج علشان يحافظوا على أكثر عادة مقدسة عندهم. المعبد كمان فيه
أكبر تمثال لبوذا فى العالم، مصنوع بالكامل من الذهب. سيبك من المساج الغالى فى “وات
بو” وروح على هيلث لاند Health
Land.

“هيلث لاند” الموجود فى شارع 19 مكان مشهور جدًا
ونظيف للمساج. ساعتين المساج التايلاندى (85 جنيه) تجربة مش هـ تنساها. ولو وقتك مضغوط، جرب مساج الأقدام لمدة ساعة بـ
(55 جنيه) وهـ تحس أنك ماشي فوق السحاب باقى اليوم.

علشان العشاء روح شارع 55 المتفرع من شارعSukhmumvit  علشان تذوق فراخ -بسيطة لكن ممتازة- بـ (25
جنيه) فى  مطعم Boon Tong Kiat Singapore Hainanese Chicken Rice restaurant.

الناس اللى بـ تدور على خروجة ممتعة بالليل متأخر يروحوا
السوق الليلي Night Market
أو سوى كاوبوى Soi Cowboy.
باتبونج نايت ماركت Patpong Night
Market (شارع فرعى رقم 1و 2) اللى بـ يفتح لحد الساعة واحدة بالليل وعنده
ساعات وملابس رخيصة. سوى كاوبوى، المعروف بالمنطقة الحمراء فى بانكوك ودي مليانة
بارات، مسافرين أوربيين، وأشكال مختلفة من الترفيه الليلي المتأخر.

فكرة ثانية للويك إند رحلة للسوق العائم. دامنوين سادواك
ماركت Damnoen Saduak Market
(7صباحًا: 4 مساءً السبت والأحد) بـ يبيع تذكارات وهدايا للسياح. بالرغم من كده، مش
بـ تحس أنه سوق عائم بالمعنى المفهوم. سوق تالينج تشانج Taling Chan Market موجود فى غرب بانكوك وبـ يفتح
ويقفل في نفس الأوقات اللي فاتت، فيه مطاعم عائمة وأسواق جملة. استمتع بالمأكولات
البحرية والشعرية وأنت عائم فوق فلوكة وخذ معاك أكل محلى وأنت مروح علشان تتسلى
بالليل.

بعد ما تقضّي أسبوع فى بانكوك، من حقك ترتاح جنب مياه
المحيط الهندى الشفافة الصافية. إحنا بـ نقترح أنك تروح الجنوب علشان تشرب جوز
الهند على جزيرة بوكيه Phuket
المشهورة. مع خطوط الطيران التايلاندية Orient Thai تقدر تحجز تذاكر داخلية من وإلى بانكوك بحوالى
600 جنيه. نرجع ونسأل السؤال من ثانى: أنت مستنى إيه؟