The Definitive Guide to Living in the Capital , Cairo , Egypt

الصورة الرئيسية: Klara Kulikova on Unsplash

التحرش بالأطفال مش خطر بيحصل في الشارع بس، لكنه أحيانًا بييجي من دوائر قريبة جدًا. تقارير دولية متخصصة في حماية الطفل بتشير إن نسبة كبيرة من الانتهاكات بيكون وراها أشخاص معروفين للطفل أو للعائلة. وعلشان إحنا مش هنقدر نكون جنب أولادنا 24 ساعة، الحل مش في الخوف..

الدليل ده مش هدفه نشر الرعب، لكنه عن تمكين الطفل، إزاي نعلمه يفهم جسده، يثق في إحساسه، يقول لا وقت ما يحتاج، ويعرف يطلب المساعدة من غير خوف، وبالتالي يكبر وهو عارف وفاهم كويس يعني إيه تحرش وإزاي يحمي نفسه.

علمه إن جسده ملكه هو وبس

أهم قاعدة هي إن جسم طفلك مش مباح لحد. من حقه يرفض العناق أو التقبيل حتى من الأقارب. لما تطلب إذنه قبل ما تحضنه أو تبوسه، إنت بتعلمه إن الموافقة مهمة. وبتديله رسالة واضحة، وهي إن رأيه له قيمة.

عرفه أسماء الأعضاء بجدية وبطريقة علمية

التعامل الجاد مع أسماء أعضاء الجسم بيقلل إحساس العيب أو الغموض. الطفل اللي يعرف يسمي اللي حصل له بوضوح، بيبقى أقوى وأصعب على أي شخص يستغله أو يخوفه.

اشرح له حدود الجسد ببساطة

فيه مناطق خاصة لا يصح لمسها أو رؤيتها من أي شخص، إلا في وجود أحد الوالدين ولسبب طبي واضح. لازم يعرف إن أي طلب من حد يشوف أو يلمس أو يصور جسمه هو سلوك مرفوض تمامًا، وعليه يرفض فورًا ويخرج ويبلغ شخص آمن.

علمه يقول “لا” بصوت مسموع

الطفل لازم يعرف إن من حقه يعترض، حتى لو الشخص كبير. دربه يقول جملة واضحة زي: “لا، مش عاوز كده”، ويمشي فورًا من المكان. الجرأة دي بتتزرع من البيت لما نحترم رفضه في المواقف اليومية.

فرق له بين اللمس الآمن والمزعج

مش كل لمس خطر، لكن في لمس بيخلي الطفل مش مرتاح. اسأله: بتحس بإيه لما تبقى مطمئن؟ وبتحس بإيه لما تخاف؟ علمه يثق في إحساسه الداخلي. لو جسمه بيديله إنذار، لازم يسمعه.

مافيش أسرار تخوف

فيه أسرار حلوة زي مفاجأة عيد ميلاد، وفيه أسرار وحشة بتخلي الطفل قلقان أو خائف. أي حد يطلب من طفلك يكتم حاجة بتضايقه أو تخوفه، ده مش سر.. ده إنذار لازم يتقال فورًا لشخص كبير موثوق.

اصنع له شبكة أمان

من سن صغير، خلي لطفلك دايرة أمان من 4 أو 5 أشخاص يقدر يلجأ لهم من غير خوف. يفضل يكون فيهم حد خارج العائلة زي معلم أو أخصائي اجتماعي. إحساسه إن فيه أكتر من باب مفتوح قدامه بيديله قوة.

راقب التغيرات السلوكية

الخوف أو الصمت المفاجئ، اضطرابات النوم، الانعزال، أو نوبات غضب غير مبررة… كلها إشارات محتاجة انتباه. أهم حاجة إن البيت يفضل مساحة آمنة للكلام، من غير تهديد أو لوم.

خليك دايمًا نقطة الأمان

الطفل اللي متأكد إن أهله هيصدقوه ويحموه، هيتكلم. اللي خايف من العقاب أو التشكيك، هيسكت. اسمع من غير ما تقاطع، وطمّنه إنك جنبه مهما حصل.

وأخيرًا..

حماية طفلك مش معناها تعيشه في خوف. معناها تزرع جواه وعي وثقة وحدود واضحة. كل ما كان البيت مساحة حب وأمان غير مشروط، كل ما فرص استغلاله بره قلت جدًا.