من قمر الدين للخشاف.. فوائد 7 مشروبات رمضانية على سفرة المصريين
تمر هندي خروب خشاف رمضان سفرة رمضان سوبيا صحة في رمضان عرقسوس عصائر طبيعية قمر الدين كايرو360 كركديه مشروبات رمضان
Mohamed Talaat
مشروبات رمضان في مصر مش مجرد عصائر بتتحط على السفرة، دي جزء أساسي من طقوس الشهر الكريم وهوية السفرة المصرية. وفي رمضان 2026، ورغم كل التريندات الجديدة في الأكل والشرب، بتفضل المشروبات الرمضانية الكلاسيكية هي الاختيار الأول عند وقت آذان المغرب. من قمر الدين والتمر هندي للكركديه والخشاف.
جمعنا لكم في كايرو360 أهم مشروبات رمضان وفوائدها الصحية علشان تختار المشروب اللي يرجع طاقتك ويظبط جسمك بعد ساعات الصيام.
قمر الدين.. مشروب المشمش وفوائد تقوية المناعة
القمر الدين هو الراعي الرسمي لرمضان، مافيش بيت مصري مابيعملش حساب “لفة قمر الدين” قبل رمضان، مشروب المشمش المركز ده هو أيقونة شهر رمضان 2026 وكل رمضان فات وقادم.
ليه تشربوا قمر الدين؟! بعيدًا عن طعمه المزز الحلو اللي بيخطف القلب، هو قنبلة فيتامينات، خاصة A و C، وده بيخليه ممتاز لتقوية المناعة وتحسين عملية الهضم بعد صيام يوم طويل.
التمر هندي.. ملين طبيعي في رمضان
التمر هندي هو كاسر العطش، بمجرد ما تشوف لونه الغامق، بتفتكر فورًا عربيات العصير التراثية في شوارع القاهرة القديمة، ولكن خلوا بالكم لازم يكون طبيعي مش صناعي بألوان ومكسبات طعم.
ليه تشربوا التمر هندي؟! التمر هندي مش بس منعش، ده بيشتغل “ملين طبيعي” لطيف وبيساعد جدًا في الهضم، ده غير إنه غني بمضادات الأكسدة اللي بتحمي الجسم.
ما يفوتكش كمان: دليل خيم رمضان 2026.. أسعار الإفطار والسحور في أفضل أماكن الخروجات الرمضانية
الكركديه.. مشروب لخفض الضغط وظبط المزاج
الكركديه (العناب) هو ملك الروقان، سواء بتحبه سخن أو ساقع، الكركديه هو المشروب اللي بيظبط “المود”، ولونه الأحمر القاني ده لوحده حكاية، واحنا بننصحكم بكركديه “لوزة” الأسواني” لأنه الأفضل.
ليه تشربوا الكركديه؟! معروف بقدرته السحرية على خفض ضغط الدم المرتفع، وكمان بيدي إحساس عالي بالانتعاش والهدوء بعد توتر الجوع والعطش.
الخشاف.. وجبة طاقة كاملة بعد الصيام
الخشاف مش مجرد مشروب ده طبق حلويات في كاس ويعتبر وجبة كاملة متكاملة، ميكس ما بين التمر مع القراصيا والمشمشية والتين المجفف بيعملوا سيمفونية طعم محدش يقدر يقاومها.
ليه تشربوا الخشاف؟! لأنه يعتبر “محطة طاقة” ومصدر قوي للألياف الطبيعية والمعادن اللي الجسم فقدها طول اليوم وقت الصيام، وبيظبط مستوى السكر في الدم بشكل متوازن.
العرقسوس.. مشروب رمضاني مثير للجدل
العرقسوس مشروب غريب، وزي ما له محبين له أعداء، والناس بتنقسم حوله بس الأكيد إنه جزء لا يتجزأ من الفلكلور المصري ومشروبات رمضان المتميزة.
ليه تشربوا العرقسوس؟! خلاصة القول لو بتحبوا طعمه هتستفيدوا جدًا منه لأنه بيساعد في علاج قرحة المعدة وبيهدّي الجهاز الهضمي، وبيرفع ضغط الدم المنخفض (فخلي بالكم لو حد بيعاني من الضغط العالي).
ما يفوتكش كمان: أماكن تشتري منها أحلى ياميش رمضان في مصر 2026
السوبيا.. طاقة سريعة بطعم جوز الهند
السوبيا مشروب ساحر للأطفال والكبار، بطعمه الكريمي ونكهة جوز الهند اللي بتدوب في البق.
ليه تشربوا السوبيا؟! السوبيا بتدي إحساس بالشبع وبطاقة مستدامة، لأنها غنية بالكربوهيدرات والسكريات اللي بيحتاجها المخ والجسم عشان يفوق.
الخروب.. مشروب طبيعي بيرطب الجسم ويحمي من الجفاف
الخروب من المشروبات الطبيعة اللي طعمها مميز، وبترجعنا لأيام زمان والخير بتاع أهالينا.
ليه تشربوا الخروب؟! مش بس لأنه مشروب طبيعي 100% ولكن كمان هو مشروب غني بالمعادن اللي بترطب الجسم وبتحميه من الجفاف، ومفيد جدًا لصحة الكلى.
وأخيرًا..
رمضان يعني لمة، واللّمة ماتحلاش غير بمشروب ساقع يروي العطش، ومحتاجين نعرف منكم في التعليقات، إيه هو مشروبكم الأساسي اللي لازم يكون أول حاجة تنزل معدتك مع صوت الآذان.
رمضان كريم عليكم جميعًا من أسرة “كايرو 360”.
