The Definitive Guide to Living in the Capital , Cairo , Egypt

لو كنت طالب جامعي وحابب تحول من كلية لكلية تانية في جامعة القاهرة، فيه خبر مهم علشانك.. الدكتور محمد عثمان الخشت رئيس جامعة القاهرة، أعلن رسميًا، عن فتح باب التحويلات أمام الطلاب الراغبين في التحويل لكليات جامعة القاهرة للعام الدراسي الجديد 2021/2022 اعتبارًا من يوم السبت 21 أغسطس الجاري ولمدة شهر؛ وده عن طريق تقديم الطلبات بمركز التحويلات بمدينة الطلبة.

تعالوا نعرف تفاصيل وشروط التحويلات من أي كلية في أي جامعة لكلية تانية في جامعة القاهرة:

الطلاب الراغبين في التحويل لازم يحصلوا في البداية على بيان حالة دراسية من الكليات المحولين منها، بشرط أنه مايقلش التقدير العام للطالب عن ممتاز للتحويل لكلية الهندسة وكليات المجموعة الطبية، وجيد جدًا بالنسبة لبقية الكليات العملية التانية، وتقدير جيد للكليات النظرية، وهيفرض على الطالب المواد اللي ماسبقش له دراستها بجامعة القاهرة طبقًا للوائح الكليات.

أما بالنسبة للطلاب المستجدين الحاصلين على الثانوية العامة، فدول تحويلهم للكليات المتناظرة أو نقل قيدهم للكليات غير المتناظرة بيتم عن طريق مكتب تنسيق القبول بالجامعات، والتحويل لبرامج الساعات المعتمدة بمختلف كليات الجامعة بيتم عن طريق الجامعة والكلية.

والتحويلات بتتم في إطار النسبة اللي بتحددها مجالس الكليات وفي ضوء إمكانياتها بالنسبة لأعداد الطلاب المحولين إليها والشروط الداخلية للكليات، والأولوية في التحويل بتكون للطلاب الحاصلين على الدرجات الأعلى، واللي محل إقامتهم في النطاق الجغرافي لجامعة القاهرة.

وبتلتزم كليات جامعة القاهرة بالقواعد اللي أقرها مجلس الجامعة بشأن التحويلات، وتطبيق قرارات المجلس الأعلى للجامعات بشأن الطلاب المكفوفين وذوي القدرات الخاصة والمفصولين.