The Definitive Guide to Living in the Capital , Cairo , Egypt

كتب: نجلاء أشرف

“حبوا بعضن تركوا بعضن” “يا دارة دوري فينا” وأغاني أكثر لفيروز أعادت داليا يونس تسجيلها بصوتها المميز واللي مليان حنين، داليا اللي اتخرجت من كلية الطب عملت أكثر من تحدي في حياتها، التحدي الأول أنها غيرت مسار حياتها وقررت تشتغل في مجال التعليم وتنمية المجتمع مش الطب! ومؤخرًا قررت تعلن عن موهبتها للعالم كله، وتمارس الغناء اللي بتعتبره أكثر حاجة بتحبها وبتلاقي نفسها فيها. إحنا قابلنا داليا وقررنا نسمعكم مجموعة من أغانيها ونعرفكم عليها أكثر. علشان نثبت أن مصر ولادة والمواهب “الحقيقية” فيها ما بتوقفش.

 

 

من الطب للتعليم للغناء ولسه اللي جاي أحلى

الإنسان لما بيتعرض لصدمة أو حزن شديد بيحتاج أنه يعمل حاجة تخليه يرجع يحس بطعم الألوان، وبجمال نسيم الهواء في يوم حر، أو ريحة الأرض بعد المطر، مش من السهل أبدًا إن الانسان ينسى ذكريات 8 سنين من حياته خاصة لو مرتبطة بأشخاص، بس داليا قدرت  تغير مسار حياتها لأكثر من مرة، فبالرغم أن مش من السهل أبدًا أن حد فضل يدرس طب لأكثر من 7 سنين ومرة واحدة ياخد قرار أنه يسيبه ويعمل الحاجة اللي بيحبها إلا أن مافيش مستحيل في سبيل الوصول للحلم اللي بيخلي قلبك يرجع يدق بقوة من حماسه وخوفه ليفشل، فيبدأ مغامرة جديدة بطلها سعادة قلبه، وده اللي داليا بدأت تعمله من رابعة كلية وده اللي حققته تاني بالغناء علشان تقاوم ألم الإنفصال في زواجها بأجنحة الشغف، وبدأت تشتغل free lancer لحد ما لاقت نفسها في الـ creative communaction وهي حاليًا بتشتغل مع أكثر من مكان منهم   اليونيسف UNICEF.

الغنا بوح القلوب

“لما بغني بحس إني فوق الأرض بأتنين تلاتة سنتي كده، بحس أني بعمل أكترحاجة بحبها في الدنيا” دي أول جملة سمعناها من داليا، الصوت المصري الأصيل وكلمت كلامها: “بحس كمان أني بنقل الجمال اللي طول عمري بحسّه وأنا بسمع للناس، وبشوف ده في وشوشهم لما حد يبتسم أو عنيه تدمع أو يسرح علشان افتكر حاجة، بحس إن الغنا تذكرة للقلوب”.

 

أغاني أطفال للجميع

لما داليا بتغني بتنقلنا لعالم جميل فيروزي يخرجك من التشتت وكأنه أول عصير ساقع تشربه بعد التوهان في الصحراء لأيام. داليا يونس مش بس ست عاملة شاطرة ومتميزة في شغلها، لأ كمان هي أم لطفل عنده حوالي سنتين، وعملت قائمة خاصة بأغاني الأطفال من تراثنا التسعينياتي زي الشاطر عمرو، والأبجدية باللغة العربية، والمميز في صوت داليا أنه دافي وفعلًا يساعد الأطفال أنها تتعلم وتستمتع بالأغنية، وتقدروا تشوفوا الأغاني من اللينك هنا.

 

داليا بدأت تكتشف في أنس ابنها أذن موسيقية جدًا وأنه بيفضل أغاني عن أغاني، يمكن كان متأثر بحفلة مارسيل خليفة اللي حضرها وهو لسه جنين في بطن مامته. وزي ما داليا قالت لـ #كايرو_360 وهي بتفتكر طفولتها ولحظاتها السعيدة وبتجري وراء أحلامها:” افتكرت لما بدات أغني لأنس قد إيه أنا كنت ببقى مبسوطة لما حد بيغني لي وأنا صغيرة، وقررت أغني أغاني عفاف راضي بتاعة زمان بس بطريقة تساعد على النوم، فتكون أغاني تتغنى للأطفال قبل النوم، توفر للأطفال اللي ماعندهمش أم سواء أيتام أو لاجئين أو حتى مامتهم مش بتعرف تغني أنهم يستمتعوا بالتجربة دي، ومايتحرموش منها”.

ومن أحلام داليا إن الأغاني دي توصل لدور الأيتام واللاجئين علشان مايتحرموش من تجربة إن حد بيغني لهم قبل النوم بصوت دافي وحنون يشعرهم بالأمان.

 

 الدنيا ريشة في هوا

ماحدش بيعيش حياته مرتين علشان كده كل واحد بيخاطر وبيحاول يعمل اللي بيحبه، ويجرب أكثر من مرة لحد ما يوصل لحلمه، ومن هنا نقدر نقول إن داليا يونس بدأت تاخد أول خطوة في حلمها، وهي أول حفلة رسمية لها، وهتكون يوم عيد الحب في دوار في وسط البلد والدخول مجاني، وتقدروا تشوفوا التفاصيل من الإيفنت هنا.

 

الحفلة هتكون مختلفة جدًا ومش موجهة للناس اللي بيحبوا بس، بالعكس دي للناس اللي بتعاني من اللون الأحمر في اليوم ده وحصار الدباديب والورد باختصار يعني للسناجل بالأخص وللحبيبة عامة، فهتلاقوا الأغاني متقسمة ما بين عربي وإنجليزي عن مواضيع مختلفة ومطرقعة زي صاحبتها، وهتكون متقسمة كالتالي:

ما بعد الفركشة : وهي أغاني بتوصف مشاعرنا بعد الانفصال (حزن ، راحة، ألم، روقان ، حكمة ، إلخ)

“وإحنا قاعدين” : ودي أغاني بتوصفنا وإحنا بتفرج على الناس اللي بتحب وبترتبط وبتفركش وبتتخطب وبتتجوز وبتتطلق واحنا قاعدين في صحراء عاطفية جرداء.

“الكراش” : أغاني عن السناجل اللي بيكراشو على غيرهم في صمت لأن -كما هو معروف- الحب من غير أمل أسمى معاني الحاجات يا يسرية.

“الأحلام الوردية” : ودي هتكون أغاني بتوصف العلاقات العاطفية الحالمة واللالاند اللي ناس كتير بتتمنى تعيش فيها وقت الارتباط.

“الطائر الحر”\أنا حلوة وبيضة وطعمة وإشطة” : ودي أغاني هتتكلم عن انطلاقنا وحريتنا كسترونج اندبنت بيبول.

 

 

أول خطوة للحلم

دي أول خطوة في حلم داليا واللي أكيد مش هتكون الأخيرة، لو عاوزين تحضروا حفلتها وتشوفوا لمعة الشغف في عنيها وهي بتغني ماتفوتوش الحفلة.

ممكن تسمعوا كل أغاني داليا من اللينك ده. كمان ممكن تتابعوا داليا على صفحتها على الفيسبوك هنا.