The Definitive Guide to Living in the Capital , Cairo , Egypt

القاهرة مدينة مش بتتكرر.. وده مش بس بسبب تاريخها أو شوارعها، لكن كمان بسبب مطاعمها اللي بقت جزء أساسي من تجربة أي زائر أو حتى أي حد من سكان العاصمة. الأكل هنا مش مجرد وجبة، لكنه تجربة كاملة بتجمع بين الطعم، والروايح، والثقافة، وحكايات سنين طويلة من مطابخ مختلفة مصرية وعربية وعالمية. علشان كده بقت فكرة الـ Food Tour واحدة من أهم الطرق اللي يخليك تكتشف القاهرة بطريقة مختلفة، وتعرف قد إيه المدينة غنية بتجارب أكل مش هتلاقي زيها في أي حتة.

وإحنا في كايرو360 جمعنا لكم أهم 10 مطاعم في القاهرة لازم تجربوها سنة 2025.. أماكن أثبتت نفسها بجودة طعم، خدمة، تجربة مختلفة، ونكهات بتخلي الزيارة واحدة من أحلى لحظات يومك. وده الدليل الكامل اللي هيسهل عليك الاختيار مهما كان نوع الأكل اللي بتحبه.

أبو حيدر – ملوك الشاورما المصري

لو بتدور على الشاورما المصري الأصيلة يبقى البداية الصح هي أبو حيدر. المطعم فاتح من سنة 1968 ولسه محافظ على نفس النكهة اللي خلت اسمه علامة مميزة في مصر الجديدة.

بيعتمدوا على طريقة تسوية خاصة، وسندوتشاتهم دايمًا سخنة وطازة، ورغم إن عندهم أصناف تانية زي الكبدة والكفتة والسجق لكن الشاورما هي اللي خلت المكان أسطورة.

العنوان: 2 سكة سليمان باشا – شارع ابراهيم اللقاني – مصر الجديدة

رقم التليفون: 0222570871

الربيع – أحلى حواوشي وطواجن بلدي

لو ليك في الأكل البلدي السخن اللي من قلب اللحمة، فالربيع واحد من أنضف وأشهر الأماكن اللي لازم تجربها.

ومش بس الحواوشي، لكن كمان طواجن “الفريك – العكاوي – الكوارع” اللي بنرشحها بقوة لإنها معمولة بإيد شيفات فاهمين الطعم الأصلي للأكل البلدي.

العنوان: شارع محمد الإمبابي – مدينة التحرير – إمبابة

رقم التليفون: 17198

Fish & Chips – كُل واتصور

مطعم Fish & Chips مش بس أكل، ده تجربة كاملة. البلكونة اللي وسط البلد كلها بتتصور عندها بقت لاند مارك لوحدها.

المكان كان زمان اسمه “أسماك الشامي” وكان من رواده الملك فاروق، واتطور بشكل كبير لحد ما بقى مطعم عالمي الطابع.

أشهر حاجة عندهم؟ من غير تفكير: شوربة السي فوود اللي ناس كتير بتقول إنها أحلى شوربة بحر في مصر.

العنوان: 37 أ شارع البستان – جنب مترو محمد نجيب

رقم التليفون: 01222289826

أبو طارق – الكشري اللي عرف العالم مصر

مفيش قائمة أكل مصري من غير أبو طارق.

ده حرفيًا امبراطور الكشري، وأول اسم بيخطر في بال أي زائر عايز يجرب أكل شعبي أصيل. المطعم بقى محطة مهمة للأجانب اللي عايزين يكتشفوا نكهات مصر.

العنوان: تقاطع شارع شامليون مع معروف – وسط البلد

رقم التليفون: 16011

زووبا – فول وطعمية بس على الطريقة الراقية

زووبا قدر يغير مفهوم الأكل الشعبي، وقدمه بطريقة مودرن وبجودة عالية جدًا.

الطعم مش بس حلو، لكن كمان فيه روح القاهرة اللي محطوطة في كل طبق.

المكان دخل قائمة أفضل 50 مطعم في الشرق الأوسط، وشعاره “فريش بطعم القاهرة” مش مجرد كلام.

العنوان: 16 شارع 26 يوليو – الزمالك

رقم التليفون: 16082

الآغا Al Agha – الشامي اللي المصريين حبوه

مطعم سوري بمذاق مختلف، والميزة إنه بيجمع بين الأكل السوري والمصري.

شاورما كرواسون بتاعتهم بقت تريند، وعندهم فروع كتير وتجارب ثابتة في الجودة، خصوصًا فرع الدقي اللي ناس كتير بتعتبره الأفضل.

العنوان: 148 شارع فهيم – الدقي

رقم التليفون: 16316

سلطان سراي – التجربة التركية الأصيلة

لو بتحب الأكل التركي أو الفطار التركي الغني، فسلطان سراي واحد من أجمل الأماكن.

جودة عالية، أصناف كتير، وأوبن بوفيه في أيام معينة.

مكان مناسب جدًا لدوق جديد ومختلف.

العنوان: مول إيست هب – مدينتي

رقم التليفون: 01020116617

Petit Palmyra – أجواء ملكية من 1949

مطعم كلاسيكي مصري بطابع أوروبي.. ديكوراته راقية جدًا، هادي، ورومانسي.

بيقدم أكل عالمي وعربي، والمكان مناسب للعشاء الهادي أو أي مناسبة خاصة.

العنوان: 27 شارع الأهرام – الكوربة

رقم التليفون: 0224156836

نيفة النجاحي – الطعم اللي بيحكي 100 سنة

من 1915 والمكان ده بيقدم النيفة على أصولها.

طعم أصيل وجودة ثابتة بخبرة سنين، ومكانه في الغورية حافظ على رونقه الشعبي الجميل.

العنوان: 24 حارة المنجدين – الغورية

رقم التليفون: 01112826167

piccolo mondo – إيطاليا على ضفاف النيل

من أكتر الأماكن اللي بتقدم تجربة أوروبية كاملة.

الديكور عالمي، البيتزا والباستا بطعم إيطالي أصيل، والمكان كله على مركب في النيل.

لازم حجز قبل ما تروح علشان الإقبال كبير.

العنوان: مركب الباشا 1901 – كورنيش الزمالك

رقم التليفون: 0227356730