The Definitive Guide to Living in the Capital , Cairo , Egypt

للأسف بعض الأفلام بتحاول تناقش قضايا كتير من خلال أحداثها، وده اللي حاول صناع بث مباشر أنهم يقدموه، لكن في النهاية كانت نتيجة الفيلم سيئة على الصعيد الفني. تعالو نتعرف أكتر على التجربة دي.

القصة

الفيلم بيحكي عن قصة ظابط شرطة موقوف عن العمل بيحاول يقبض على شخص نصاب، وفي إطار بحثه عنه بيكشف كتير من قضايا الفساد في المجتمع، وبتحصل له كتير من المواقف الكوميدية اللي مش بتنقطع على مدار يوم كامل من البداية للنهاية.

فريق العمل

الفيلم من بطولة سامح حسين وسامية الطرابلسي ومصطفى عباس ومحسن منصور مع مشاركة كتير من الفنانين والنجوم زي مراد مكرم (مقدم برنامج الأكيل) والمذيعة إنجي علي وغيرهم.

الفيلم من تأليف طارق رمضان وإخراج مرقس عادل.

الأداء التمثيلي

للأسف الأداء التمثيلي لكل الأبطال تقريبًا كان ضعيف ونمطي ومحفوظ، ماشوفناش أي بطل من أبطال الفيلم خارج النمط التقليدي اللي إحنا متعودين عليه منه، وده كان سبب رئيسي لضعف الفيلم وشعورنا بالملل والتكرار خلال الأحداث.

السيناريو والحوار والإخراج

سيناريو الفيلم كان أبعد ما يكون عن الملل، لكن على صعيد آخر السيناريو ماقدمش أي شيء جديد غير مجموعة من المواقف الكوميدية والإيفيهات اللي بتحاول تكون كوميدية، ومن هنا شعرنا أن الفيلم مبني في المقام الأول والأخير على الحوار الكوميدي ودي كانت واحدة من أهم نقاط ضعف الفيلم.

أما إخراج الفيلم فعلى الرغم من نجاحه في أنه يبعدنا عن الملل لكن إخراج الفيلم كان محتاج يكون أقوى وأكثر تأثيرًا وأكثر تمكنًا من أدواته وطريقة تقديمه لمشاهد الفيلم وتعامله معاها.

الديكورات والموسيقى والأزياء

من الصعب أننا نناقش ديكورات وموسيقى فيلم زي بث مباشر لأن تركيز القائمين على الفيلم كان غير منصب على العوامل دي خالص، على الرغم من أهميتها لنجاح أي فيلم، لكن للأسف الفيلم كان ضعيف في الديكورات والموسيقى والأزياء وباقي العناصر المكملة لأي فيلم.

الخلاصة

فيلم بث مباشر حب يقدم جرعة من الأكشن مع الكوميديا مع مناقشة قضايا المجتمع، لكنه للأسف لم ينجح في تقديم أي حاجة من الحاجات دي!

علشان تبقى عارف:

نجوم الفيلم باعوا التذاكر للجمهور ضمن حملة الدعاية للفيلم.