لازم نعترف، أن تقديرنا الشخصي للفيلم من الأغنية الترويجية والإعلان، كان أقل بكثير من تقديرنا للفيلم بعد مشاهدته بالكامل.. الفيلم كان فيه جرعة عالية من الكوميديا، على الرغم من الجرعة المتوسطة من الإسفاف اللي شوفناها خلال الأحداث.
من إخراج خالد الحلفاوي وتأليف هشام ماجد وكريم فهمي، بـ نشوف قصة شاب مستهتر (حسن الرداد) اللى بـ يدخل في رهان مع والده الدكتور النفسي، وبناء على الرهان ده بـ يكون مطلوب منه أنه يعشم 3 بنات بالزواج "آيتن، مي، نسرين" بمساعدة سكرتيرة والده إيمي سمير غانم.
القصة قد تكون مكررة ومافيهاش جديد لكن مستوى الكوميديا اللي بـ تنتج عن المواقف دي عالي جدًا ومُقدم بشكل موظف ومتميز في سياق الفيلم، لكن بعض المشاهد كانت غير موظفة في السيناريو بشكل كويس، ولاحظنا أن مشاهد زي عدم حجاب والدة آيتن عامر أو مشهد الغذاء في منزلها كان كل الهدف منها الكوميديا حتى لو على حساب منطقية الأحداث.
البطولة النسائية للفيلم كانت موزعة بالترتيب على إيمي سمير غانم يليها آيتن عامر ثم نسرين أمين ثم مي سليم بالترتيب… عبء الكوميديا كله كان ملقى -فى المنطقة النسائية- على إيمي، مع مشاركة بسيطة من نسرين، لكن آيتن عامر ومي سليم ما كانش لهم مشاركة كوميدية اللهم إلا ردود أفعالهم على تصرفات حسن الرداد ليس إلا.
الألفاظ وعلاقة الأب والابن كانت من الأمور اللى ضايقتنا في الفيلم، الفيلم بـ يقدم مجموعة من المشاهد اللى قيل فيها ألفاظ إحنا ما نحبش نسمعها، بالإضافة لعلاقة حسن الرداد بوالده والألفاظ اللى قيلت فيها مش من الأمور اللي نحب نشوفها فى فيلم -المفروض- أنه عائلي.
الاستعراض الأخير اللي في التترات كان ضعيف، وهو نفسه الاستعراض اللي تم تقديمه في القنوات الفضائية كدعاية للفيلم، لاعتبارات خاصة بالسيناريو ما كانش ينفع تضمينه في الأحداث فتم وضعه بالكامل مع التترات، ميزة الموضوع ده أنه مش "بـ يفصل" المشاهد من المتابعة، وعيبه أنه بـ يظل كوحدة مستقلة بذاتها في الفيلم وليس لها محل من الإعراب.
إيمي سمير غانم بـ تثبت يوم بعد يوم موهبتها الكوميدية الكبيرة، آيتن ما قدمتش جديد على الرغم من ظهورها بالحجاب في دور الفتاة الملتزمة، نسرين أمين وبعد مشاركتها في مسلسل "سجن النسا"، كانت خطوة كويسة منها أنها تتجه للكوميديا بعض الشىء، أما مي سليم كانت عبء زايد على الأحداث يمكن التخلص منه وتقليص مدة عرض الفيلم.
"زنقة ستات" فيلم كوميدي (غير عائلي) هـ يموتكم من الضحك، لكن مش هـ يقدم أكثر من كده، ومش هـ ننتظر منه أكثر من اللي قدمه، لأنه قدمه بشكل قوي وعكس ما يظهر من إعلانه تمامًا.
أكتب تقييم
مقترح
فن وثقافة
في الويك إند.. دليلك للسفر في رحلة بصرية مبهرة مع توت عنخ آمون
الجيزة المتحف المصري الكبير +5
معالم وسياحة
