The Definitive Guide to Living in the Capital , Cairo , Egypt

شوفنا أفلام كتيرة بتنتمي لفكرة الرعب القائم على المخلوقات الشريرة أو الاستحواذ الشيطاني، وكان معظم الأفلام دي هوليودية أمريكية، النهارده بنشوف مع بعض فيلم إسباني بيتناول نفس الحبكة، لكن هل اختلاف جنسية الفيلم بيعني اختلاف طريقة الرعب داخله؟ تعالوا نتعرف أكتر على Marrowbone.

القصة

الفيلم بيحكي عن مجموعة من الأخوات بيعيشوا مع بعض وبيحاولوا يداروا سر وفاة والدتهم المقربة إلى قلبهم. لكن الأسرة بتختبر تجربة وجود كيان شيطاني معاهم في المنزل، واللي بيحول حياتهم لجحيم ونبدأ نكتشف مجموعة من الأسرار اللي هتغير وجهة نظرنا عن الأحداث بالكامل.

فريق العمل

الفيلم من تأليف وإخراج  سرجيو جي سانشيز ومن بطولة  أنيا تايلور جوي وتشارلي هيتون وميا جوث وجورج ماكاي وكايل سولر وروبرت نايرن

الأداء التمثيلي

الأداء التمثيلي لأبطال الفيلم كان جيد، ويمكن من المرات القليلة اللي نلاقي فيها تمثيل وأداء تمثيلي قوي في فيلم رعب بعيدًا عن الاستسهال برسم معالم الرعب والهلع على الوجوه وخلاص، ونعتقد هنا أن السيناريو هو اللي أتاح للممثلين الفرصة على الظهور بالشكل ده في الفيلم وتطوير أدائهم التمثيلي.

السيناريو والحوار والإخراج

زي ما قولنا سيناريو الفيلم سهل كتير من الأداء التمثيلي على الممثلين، ونقدر نقول أن الفيلم منقسم لجزئين على صعيد السيناريو، الجزء الأول هو اللي بنشعر فيه أن (فيه حاجة غلط) وتبدأ المشاهد تسيطر علينا حتى الجزء الثاني اللي بنواجه فيه الرعب وجها لوجه وهي لحظة تفريغ كل الشحن اللي حصل لنا في الجزء الأول من الأحداث.

وبما أن المخرج هو المؤلف ده بيعطي خصوصية للفيلم وقدرة على توصيل وجهة نظره كاملة وهو الأمر اللي نجح فيه المخرج جدًا.

الديكورات والموسيقى والأزياء

جزء كبير من قوة الفيلم معتمدة على الديكورات القوية والمنفذة بحرفية عالية، والديكورات نفسها تم استغلالها في إخراج مشاهد رعب قوية أكثر من مرة. لكن الموسيقى لم تكن بنفس قوة الديكورات وحسينا أنها كانت محتاجة تكون أقوى، على الرغم من أن حركة الكاميرا واستخدام مناطق طبيعية لتصوير المشاهد الخارجية والزوايا الواسعة لبعض المشاهد كل الأمور دي كانت تحسب لصناع الفيلم ومش متعودين عليها في فيلم رعب.

الخلاصة

سواء كنت أسباني أو أمريكي أو مصري قاعد في السينما تتفرج.. يظل الرعب هو الرعب ومفرداته تقريبًا واحدة مهما تغيرت الجنسيات!

علشان تبقى عارف:

الفيلم يعتبر أول تجربة إخراجية لـ (سرجيو جي سانشيز).