The Definitive Guide to Living in the Capital , Cairo , Egypt

للأسف كان عندنا تطلعات عالية جدًا بخصوص الفيلم.. مش قادرين نقول أنه فيلم فاشل.. لكن برضه مش قادرين نقول أنه أحسن فيلم أكشن في الموسم.. باختصار: فيلم Hitman كويس كفيلم أكشن مستقل، لكن كفيلم مقتبس عن لعبة فيديو تقريبًا مافيش شاب في العالم لعبها في فترة ما من فترات حياته يبقى كان المفروض نشوف مستوى أكثر قوة وكفاءة واحترافية.

من إخراج أليكساندر باك بـ نشوف قصة عميل محترف تمت تربيته منذ الصغر والتلاعب في جيناته لاستبدال جينات الخوف والرحمة والحب بجينات القتل والتدمير وانعدام الضمير، ضمن مشروع كان بـ يهدف لخلق جيل من المقاتلين لا يمكن هزيمتهم.. بـ يخرج العميل 47 (روبرت فريند) من رحم البرنامج ده، بمهمة محددة وهي ضرورة منع تنظيم إجرامي من محاولة الوصول للعالم اللى ابتكر البرنامج، وإجباره على إعادة إحياء البرنامج وإنتاج جيش كامل من العملاء معدومي المشاعر!

مستوى الأكشن في الفيلم -بغض النظر عن الربط بينه وبين اللعبة- جميل وقوي، وفكرنا كثير بمشاهد الـGun Fu  أو المزج بين الكونغ فو وبين استخدام الأسلحة، المشاهد اللى شوفناها بكثرة في فيلم "John Wick" بطولة كيانو ريفز، نفس النوعية دي من المشاهد شوفناها بكثرة خلال أحداث الفيلم لكن مش بنفس الجودة والكمية بتاعة جون ويك.

الإخراج كان عنده إخلاص عالي للقصة الأصلية للعبة الفيديو جيم، حتى أننا بـ نشوف ترتيب الأسلحة مع العميل 47 بنفس أسلوب ترتيبها في اللعبة، وخصوصًا استعمال السلك النحاسي الحاد في مشاهد الذبح والخنق خلال أحداث الفيلم.

الموسيقى التصويرية ما كانتش قوية زي ما توقعنا، لكن الديكورات كانت متميزة وقدرت تنقل لنا الإحساس العام بجو الفيلم وخاصة لما تناغمت مع المؤثرات الخاصة وإخراج مشاهد الأكشن علشان تخرج بصورة كويسة في النهاية.

الفيلم بـ يلعب على فكرة الجزء الثاني، وده كان واضح من ختام الفيلم واللى احتوى على أكثر من مشهد بـ يوعد المشاهد من خلاله بمتابعة جزء ثاني من الفيلم وهي الموضة اللى بقيت طالعة جديد دلوقت في هوليوود وهي تقسيم أي فيلم على جزء واثنين أو حتى ثلاثة لو لزم الأمر ولو استمر الفيلم في تحقيق الأرباح والإيرادات!

Hitman سىء كفيلم مقتبس عن لعبة ناجحة، لكنه جيد كفيلم أكشن منفصل بذاته.