The Definitive Guide to Living in the Capital , Cairo , Egypt

كانت توقعاتنا قبل مشاهدة الفيلم ومن خلال إعلاناته أننا هـ نشوف فيلم خيال علمى تقليدى معتمد على الإبهار المستمد من الخدع السينمائية المُقدمة وخدمات الجرافيك اللى بـ تقدمها هوليوود بلا حدود فى أفلامها، إلا أننا فوجئنا أن عنصر الإبهار رغم تواجده إلا أنه ما كانش العنصر الوحيد اللى اعتمد عليه صناع الفيلم وعلى رأسهم المخرج جوزيف كورينيسكى لتحقيق الإبهار المطلوب، لكن المشاعر الإنسانية والمفاجآت اللى مش بـ تتوقف كانت بحق العنصر الرئيسى للإبهار .

الفيلم بـ يحكى عن حال كوكب الأرض بعد حرب شرسة مع حضارة اسمها حضارة “السكافس”، جاك هاربر (توم كروز) بـ يحاول يستخرج بعض المعلومات المهمة من مركبة فضائية محطمة، بـ تتوالى بعدها الأحداث والمفاجآت اللى مش عاوزين نحرقها عليكم لحد ما بـ يتقابل مع فيكتوريا (أندريا ريسبورغ) وبـ يواجهه عدد لا نهائى من المفاجآت طوال الوقت .

توم كروز بـ يعود بقوة للشاشة من جديد، عارفين عن كروز ميله من آن لأخر لتقديم أفلام الخيال العلمى ومش هـ ننسى دوره الرائع فى Minority report وكمان فيلم War of the Worlds اللى جسد فيه شخصية أب بـ يحاول ينقذ نفسه وأبناؤه من خطر الموت بعد احتلال كائنات فضائية متوحشة ومجهولة لكوكب الأرض بعد مشاهدة Oblivion حسينا أنه واقع فى المنتصف -من حيث الجودة- بين الفيلمين، وفى تقييمنا الشخصى الفيلم كان أفضل من War of the worlds لكن أقل من Minority report اللى بـ نعتبره واحد من أفضل أفلام الخيال العلمى اللى قدمتها هوليوود .

ما ينفعش نتكلم عن فيلم خيال علمى بدون الكلام عن المؤثرات الخاصة والجرافيك، وفى رأينا أن دى كانت واحدة من أحسن الألعاب فى الفيلم لأن تم اللعب بورقة المؤثرات بطريقة وسطية محترفة بحيث ما يكونش الفيلم معتمد على المؤثرات اعتماد تام، وفى نفس الوقت يقدم للمشاهد جزء متميز من الإبهار ظهر فى بعض المشاهد .

سيناريو الفيلم كان واحد من أفضل العناصر اللى بـ تميزه لأنه ملىء بالمفاجآت طوال الوقت، وحسينا بالصمت فى قاعة العرض استعدادًا للمفاجآت المفعم بها السيناريو، وممكن نقول أن المشاهد بعد النصف ساعة الأولى من الفيلم كان سلم كل حواسه لطاقم عمل الفيلم، وأصبح على استعداد لقبول كل ما يأتى به السيناريو، أما المونتاج فكان رائع وسلس وانتقل بنا بين المشاهد بخفة وبراعة تحسب له .

الموسيقى التصويرية ما حسيناش أنها بالجودة الملائمة للعمل ده لكن مقارنة بأعمال ثانية شوفناها قريب نقدر نقول أن مستواها كان أعلى من المتوسط، والفيلم بشكل عام يعتبر علامة مميزة وجميلة فى تاريخ توم كروز الملىء بالاختيارات الذكية اللى تحسب له .

فى النهاية Oblivion مش مجرد فيلم خفيف تشوفه فى نهاية الأسبوع، ننصحك تركز كويس فى كل مشهد علشان تحس بالمتعة الكاملة من خلال آخر أعمال العالمى المميز توم كروز.