The Definitive Guide to Living in the Capital , Cairo , Egypt

زي ما ظهرت لفترة من الفترات موضة أفلام سباق السيارات، الموجة اللى انتجت لنا أفلام زي Fast & Furious وسلسلة الأفلام اللى خرجت من رحمها بعد كده، وزي موضة أفلام الرعب وأفلام الأكشن.. إلخ بـ تخرج علينا الفترة دي موضة جديدة هي موضة أفلام الجاسوسية المأخوذة عن أعمال قديمة واللى بـ يتم تقديمها بشكل كوميدي بـ يعجب المشاهدين ويسحبهم لعالم جميل من الجاسوسية المختلطة بالكوميديا.

من إخراج وتأليف جاي ريتشي بـ نشوف هنري كافيل وأرمي هامر وأليسيا فيكاندير في دور بنت بـ تحاول تهرب من ألمانيا الشرقية الواقعة تحت سيطرة روسيا إلى ألمانيا الغربية الواقعة تحت السيطرة الأمريكية بمساعدة عميل للمخابرات الأمريكية، ثم بـ تتعقد الأمور لما بـ يطلب من العميل الأمريكي التعاون مع عدوه الروسي لإنجاز مهمة تتصف بالسرية المطلقة والخطورة الهائلة.

الأداء التمثيلي للأبطال كان متميز، وكل واحد كان بـ يقوم بدوره بشكل رائع وأعاد لأذهاننا أناقة الستينيات في التمثيل وقدر الإخراج أنه ينقلنا زمنيًا لزمن الستينيات الجميل وجمال أفلام الجاسوسية المتمثلة في الحوار الراقي أو حتى ممارسة الشر بذوق ورقي بـ يفكرنا في جزء كبير منه بأفلام جيمس بوند أو حتى أفلام المهمة المستحيلة Mission Impossible على الرغم من تخصص أفلام المهمة المستحيلة في أفلام بـ يدور زمن حدوثها فى الوقت الحالي، بينما فيلمنا بـ يتكلم عن فترة الستينيات.

مهما تكلمنا عن أفضل الأمور في الفيلم، لا يمكن ننسى أو نتناسى دور الموسيقى التصويرية الأكثر من رائعة واللى علقت في دماغنا وقررنا نبحث عنها بشكل منفصل على الإنترنت بعد كده، ده المعيار الأساسي اللى بـ نقيس عليه مدى استمتاعنا بالموسيقى التصويرية لفيلم ما.

الديكورات لعبت دور مهم وحيوي في نقلنا للستينيات والجو العام بها، مع الاهتمام بالأزياء وأسلوب الكلام اللى عكس مرحلة أفلام الستينيات وسطوع نجم أفلام الجاسوسية وخصوصًا سلسلة أفلام جيمس بوند لكن مستوى الأكشن في الفيلم ما كانش بالقوة اللى كنا نتوقعها وتم الانحياز لجرعة الكوميديا على حساب جرعة الأكشن اللى جاء ضعيف ومبتذل في جزء كبير منه، ويمكن ده السبب اللى جعل الفيلم يبتعد عن المنافسة على الخمس نجوم.

The Man from U.N.C.L.E مش أحسن فيلم أكشن.. ومش أحسن فيلم جاسوسية، وبالتأكيد مش أحسن فيلم كوميدي، لكنه بـ يقدم جرعة قوية ومتوازنة من كل العوامل دي.