The Definitive Guide to Living in the Capital , Cairo , Egypt

الحياة في كايرو

دليل أحداث نهاية الأسبوع: مهرجان D-CAF وموسيقى أندرجراوند ومعرض توظيف ومسرحيات

دليل أحداث نهاية الأسبوع: مهرجان D-CAF وموسيقى أندرجراوند ومعرض توظيف ومسرحيات
بواسطة
Cairo 360

مساء الخير على قراء كايرو 360 الأعزاء، من فترة وعدناكم بمهرجان فني فريد من نوعه وما كناش قولنا إيه هو، النهارده ينطلق مهرجان وسط البلد للفنون المعاصرة D-CAF 2013 على مسارح وفي شوارع وسط البلد، عروض رقص ومسرحيات وفنون بصرية وسينما وحفلات مزيكا وعدد من الأحداث الفنية غير التقليدية بالمرة، المهرجان مستمر لنهاية شهر أبريل، ننصحكم ما تفوتوش كثير من العروض، وانتهزوا أي فرصة تكونوا موجودين فيها في وسط البلد وادخلوا احضروا أي عرض من أي نوع، ونوعدكم أنكم هـ تنبهروا، لأننا شوفنا بعض عروضه السنة اللي فاتت وكتبنا عنها برضه، وعرفنا أن الموضوع هنا مختلف، وهـ تشوفوا حاجات أكيد ما شوفتوهاش في أي مكان قبل كده. يوم بيوم في أجندة كايرو 360 هـ تلاقوا الأحداث وفعاليات المهرجان بالمكان والساعة. تابعونا طوال فترة المهرجان. 

النهارده في أول أيام العروض ممكن تحضر حفل يجمع بين المغنية Wetrobots وBosaina من مصر وByetone من ألمانيا في سهرة موسيقى إليكترونيك في فندق شهرزاد في وسط البلد ضمن البرنامج الموسيقي للمهرجان اللي بـ يتبنى فكرة “الموسيقى المباشرة” وهـ يقدم أنماط غير مألوفة من المزيكا زي الراب الشعبي والـ DJ والهيب هوب وغيره.

وتعرض فرقة مان دريك للرقص المعاصر عرض بعنوان “أناتوميا بابليكا” على مسرح الفلكي ليومين متتاليين، يصمم الرقصات توميو فيرجيه (أسبانيا/ فرنسا) وهي مستوحاة من الأبعاد الطبيعية للجسم البشري، سعر التذاكر 20 جنيه و10 جنيه للطلبة.

ومن الحفلات الموسيقية المميزة الأسبوع ده حفل للفنانة دينا الوديدي اللي بـ ينظمه بيت الرصيف في المعادي وهـ يبدأ الليلة دي الساعة 8 مساءً. دينا هـ تقدم مجموعة من أغانيها الحديثة المعتمدة على دمج الموسيقى التقليدية مع الموسيقى الحديثة اللي بـ تستلهمها من تراث وهوية مدينة القاهرة، سعر التذكرة 30 جنيه.

على مسرح الجمهورية التابع لدار أوبرا القاهرة الليلة دي هـ يكون فيه عرض بعنوان “غير المتوقع يحدث دائمًا” من أداء فرقة الرقص المسرحي الحديث وتصميم وإخراج مناضل عنتر، تدور فكرة العرض حول الأحداث غير المتوقعة اللي بـ تصادف الإنسان يوميًا وتأثيرها الممتد سواء كان إيجابي أو سلبي وكيفية تقبله والتعامل معاه. العرض هـ يبدأ الساعة 8 مساءً والتذاكر متاحة لدى شباك الحجز.

من حوالي 4 أيام انطلق مشروع فني ثقافي بعنوان “تسعيناتي” في الدور الأول من التاون هاوس في وسط البلد، وإحنا نشرنا موضوع خاص عن المشروع يوم الأحد اللي فات. وهو مشروع يعرض المشهد الإعلامي المصري في فترة التسعينيات من خلال كتاب فني توثيقي لعناوين الجرائد والمجلات والأبحاث العلمية وكل ما يخص التليفزيون المصري ويشمل أيضًا إنتاج فيلم وثائقي مع رمز صناعة الإعلام في هذه الفترة.

معرض “الزعيم” في مركز آرت اللوا للفنون عبارة عن مشروع بـ يسخر من فكرة الزعامة الموجودة في العالم العربي وبـ يسأل “من هو الزعيم؟“، المعرض يضم نماذج من المزيج البصري بين زعماء التاريخ وشخصيات معاصرة عن طريق أدوات فنية زي الفوتوغرافيا والكولاج والجرافيك والخط العربي، الافتتاح كان يوم 26 مارس اللي فات والمعرض مستمر حتى يوم 14 أبريل.

يوم الجمعة فيه عروض ممتعة ضمن فعاليات مهرجان وسط البلد للفنون المعاصرة. فرقة بوت ووركس المسرحية من بريطانيا هـ تقدم مسرحية بعنوان “الفتي المذهل الذي يأكل الكتب” من الساعة 1 لـ 2:30 ظهرًا ومرة ثانية من 3:30 لـ 5 مساءً. العرض فريد من نوعه بـ يكون فيه الجمهور داخل صندوق مغلق وتدور أحداث المسرحية على المسرح من حوله.

بمناسبة اقتراب شم النسيم يستقبل ديزاينوبوليس سوق كايرو Flea على مدار يومين علشان تختاروا ما بين ألعاب الأطفال ومجموعة كبيرة من السلع يدوية الصنع والتحف والمأكولات الظريفة. ادخل على صفحة الحدث على موقعنا علشان تعرف تفاصيل أكثر عن المعرض.

بكرة الساعة 10 صباحًا تنظم شركة أوربت لاين وامبلوير ماجازين مؤتمر توظيفي بمشاركة عدد من الشركات والمؤسسات اللي بـ تعرض فرص متنوعة للتوظيف في قاعة الأزهر للمؤتمرات بمدينة نصر. روح بدري وخذ معاك الـ C.V لو كنت بـ تدور على شغل. المعرض مستمر لمدة يومين.

يوم السبت ميعادنا مع حفل موسيقي في مركز درب 17 18 وهو بعنوان “الأنردجراوند لسه عايش.. الجزء الأول” بمشاركة فرق مختلفة وهم: “عشرة غربي” و”مشروع لوبيريا” و”ليل وعين” و”تي كي كابويرا”. موسيقى الأندرجراوند أو الفرق الموسيقية المغمورة محتاجة حفلات ومهرجانات زي دي علشان توصل لقطاعات مختلفة من الجمهور، ياريت الفكرة تعمم. سعر التذكرة 20 جنيه.

ضمن فعاليات مهرجان وسط البلد للفنون المعاصرة يوم السبت هـ يتم افتتاح معرض الفن التفاعلي “إنترلاب القاهرة – دريزدن” في مركز مدرار الثقافي في وسط البلد، العروض يوميًا ماعدا الجمعة في مدرار وساحة الفيينواز.

طبعًا بـ نرشح لكم كل عروض مهرجان D-CAF السنة دي، والأسعار معقولة وفي متناول الجميع. وما تنسوش تلقوا نظرة على باقي الأحداث اللي في أجندة موقعنا، ونتمنى لكم أجازة سعيدة ومفيدة.

مقترح