The Definitive Guide to Living in the Capital , Cairo , Egypt

أورانج سكوير – Orange Square

أورنج سكوير: بِدَل رجالي جاهزة وتفصيل في الزمالك

تم التقييم بواسطة
Ahmed El Mezeny
قيم
قيم الآن
أورنج سكوير: بِدَل رجالي جاهزة وتفصيل في الزمالك
قريب من منطقة الكافيهات المشهورة بتاعة فندق أم كلثوم في الزمالك، وبالتحديد في الشارع اللي ورا أبو الفدا اللي إسمه «إبن النبيه» وعلى ناصية الشارع تقريباً هـ تلاقي «أورنج سكوير- Orange Square». محل بِدَل رجالي متخصص في التفصيل والتَكسيدو.

صعب انك ما تاخدش بالك من اليافطة البرتقالي الواضحة. في الفاترينة المحل عارض بِدَل عادية وبِدَل تكاد تكون سخيفة. هـ تنزل كام سلمة كده عشان توصل للمحل. الديكور شيك، ألوانه دافية، لكن الإضاءة غريبة. المحل مصمم عشان يوحي إنه واسع وده بفضل إن في حيطة كاملة عبارة عن مراية ضخمة، مع إنه في الواقع مساحته أصغر من المعتاد، بس دي مش حاجة غريبة على الزمالك.
 
وبما إن في حيطة كاملة عليها مراية، باقي الحيطان طبيعي متغطية بالكامل بالملابس. البِدَل، قمصان وغيره كانت مرصوصة بشكل منظم ومتناسق، بحيث مافيش حاجة تبان احسن من اللي جنبها. في الوسط في طرابيزة عالية سطحها مراية، فوقيها وتحتيها ملابس معروضة، صحيح مش أحسن طريقة للعرض بس لايقة مع ديكور المحل.

أورنج سكوير بـ يعرض مجموعة من البِدَل الفخمة جداً بـ تبتدي أسعارها من ٣٢٠٠ جنيه وكرافتات بـ تبتدي من ١٠٠ جنيه وانت طالع، تشكيلة صغيرة من البالطوهات بـ تبتدي من ٣٠٠٠ جنيه واحزمة جلد بـ٦٠٠ جنيه وفي عدد قليل من الجزم متبعتر في المكان . في كمان تشكيلة ملابس كلاسيك شبابي شيك: البِدَل الـ«سليم فيت» الضيقة والكرافتات الرفيعة بكل الالوان تقريباً.
 
الخدمة هايلة في المحل، صحيح أول ما تدخل مش هـ تلاقي حد بس هـ يجي مسؤول بيع يساعدك بحماس وترحيب في ثوان من أوضة التفصيل اللي جوة المحل.

كل اللبس عليه تيكيت مكتوب عليه «أورنج سكوير»، ماركة مش معروفة ولو دورت على جوجل هـ تلاقي معلومات بسيطة عنها. ولما تسأل مسؤول بيع هناك هما بـ يجيبوا الِبِدَل بتاعتهم منين هـ يكون الرد مشوش ايطاليا، إنجلترا – مش واضح! مع ذلك في مصادر تانية بـ تقول ان الخامات مستوردة بس تصنيع البِدَلة بـ يتم في مصر.

الحاجة اللي بـ تميز المحل هي البِدَل التفصيل اللي الترزي بـ ياخد فيها مقاسك بالظبط وبـ تختار انت نوع القماش سواء انجليزي أو إيطالي (إيطالي احسن طبعاً). وبـ تطلع في منتهى الروعة. ممكن تروح في أي وقت وتدخل الأوضة اللي جوة بتاعة التفصيل على طول.
 
البِدَلة بـ تاخد من ١٠ لـ١٥ يوم عشان تـ تفصل، انما الحاجات الجاهزة يوم واحد وبتـ تظبط على المقاس، الترزي هناك كمان ممكن يحطلك اي حليات أو زينة للبِدَل زي الساتان وممكن يفصلك تكسيدو كامل من الأول للآخر.

ارخص من «ارماني» بس اغلى من «بي تي ام»، يعني تقدر تقول اسعاره في الوسط المرتفع يعني من الاخر لو عايز تصرف شوية على بِدَلة من غير ما تبوظ الميزانية .. يبقى المحل ده عشانك .

نصيحة 360

لو هـ تفصل خد مقاسات مرحرحة شوية عشان البِدَلة هـ تطلع مظبوطة عليك تمام

أحسن حاجة

خدمة رائعة ولبس كلاسيك شبابي شيك

أسوأ حاجة

الركنة في شارع «إبن النبيه» شبه مستحيلة

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح