The Definitive Guide to Living in the Capital , Cairo , Egypt

إمتنان – Imtenan

إمتنان: منتجات صحية فى المتناول فى مول كايرو فيستيفال سيتى

تم التقييم بواسطة
Aliaa Serry
قيم
قيم الآن
إمتنان: منتجات صحية فى المتناول فى مول كايرو فيستيفال سيتى

جنون الحياة الصحية يجتاح القاهرة، طبعًا إحنا مش بـ نشتكى، لكن المشكلة مع أغلب المنتجات الصحية أنها عادة بـ تكون غالية. اللى بـ يحصل فى النهاية أنك غصب عنك بـ تخصص ميزانية ضخمة لمجرد الحصول على أكلات صحية. “إمتنان – Imtenan” قدر يكسر القاعدة بتقديمه الطلبين: منتجات صحية طبيعية وفى نفس الوقت أسعارها فى المتناول.

“إمتنان” مكانه فى المول الجديد كايرو فيستيفال سيتى، حجم فرعه متوسط، ببلاط أبيض وإضاءة جذابة وتصميمات بسيطة. أول حاجة لاحظناها لما دخلنا حاجة مثيرة جدًا، وهى أن مسئول البيع بـ يلبس بالطو معمل أبيض. علشان هم أخصائيين تغذية، كانوا مفيدين جدًا وقدروا يشرحوا إيه أكثر منتج يناسبك.

أرفف المحل بـ تعرض منتجاتهم بطريقة شديدة الوضوح والتنظيم؛ كل رف عليه منتجات مقسمة على حسب تصنيفها ما بين نشاط وريجيم، طاقة، جمال، مناعة ومضادات سموم، صحة السيدات وصحة الرجال بجانب أقسام ثانية.

نتكلم عن المنتجات الكثيرة اللى تشمل أغذية، مشروبات وحتى التوابل. إمتنان طوال عمرهم معروفين بعسلهم الرائع والمتوفر بكل النكهات اللى ممكن تتخيلها، لكن كثير من الناس مش عارفين أنهم بـ يقدموا منتجات كثيرة ثانية. معروض كل أنواع شاى الأعشاب (9: 10 جنيه للعبوة) اللى ممكن تتخيلها. الشاى المفضل بالنسبة لنا كان الشاى الأخضر، المكون من خلطة شاى أخضر مع توابل هندى قال عنها البائع أنها بـ تحرق الدهون وتساعد على تحسين عملية الهضم. شوفنا كمان شاى “للنوم” ممكن يكون هو الحل لمعضلة الأرق الأزلية.

مافيش أحلى من شوية مقرمشات صحية، وطبعًا فرحنا لما شوفنا كوكيز الشوفان بالزنجبيل (8 جنيه). أكيد وهم! هى دى أول جملة خطرت على بالنا بعد ما اكتشفنا أنهم بـ يبيعوا قمح خالى من الجلوتين بسعر قليل جدًا (28 جنيه)، وطبعًا هى معجزة أنك تلاقيها فى مصر. أغذية ثانية تشمل أرز بنى (9.50 جنيه)، بذور قرع، شوفان (11 جنيه) وبروتين بار (8.50 جنيه).

إمتنان عنده أكثر من الأكل والشرب، بـ يعرض كمان منتجات للحفاظ على جمالك. مجموعة من زيوت الشعر بـ تعمل على إصلاح الشعر التالف منها زيت جوز الهند (20 جنيه)، زيت جوجوبا (18.25 جنيه) وزيت الجرجير (12 جنيه). كمان، مجموعة مصنعة يدويًا منها زيت زيتون، عسل وصابون شوفان كانوا معروضين. زيوت للوجه برضه موجودة، منها زيت اللوز (25 جنيه).

من الممتع أنك تزور إمتنان، لأنه يمكن يكون الوحيد من نوعه فى مصر بـ يقدم منتجات طبيعية، وفى نفس الوقت أسعارها مناسبة. مشينا وإحنا معانا كل أنواع المكملات الصحية، مستحضرات طبيعية للعناية بالبشرة والجمال مع أكلات خفيفة صحية، ونقدر نقول بكل ثقة أننا أكيد هـ نرجع نشترى مرة ثانية.

نصيحة 360

تقدر تسأل عن نصائح خاصة بالتغذية على موقعهم الإلكتروني وبعدها هـ يرد عليك أخصائى تغذية.

أحسن حاجة

تشكيلة من منتجات أسعارها معقولة وطاقم عمل فاهم شغله.

أسوأ حاجة

بعض المنتجات لها نفس الفوائد ومن هنا الاختيار كان صعب.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح