The Definitive Guide to Living in the Capital , Cairo , Egypt

تسوق
ثريا مصطفى للبصريات

ثريا مصطفى: زيارة ثانية لمحل نظارات كلاسيكية رخيصة فى وسط البلد

  • 1 شارع محمد مسلوم، باب اللوق
  • نظارات
تم التقييم بواسطة
Marcus Benigno
قيم
قيم الآن
ثريا مصطفى: زيارة ثانية لمحل نظارات كلاسيكية رخيصة فى وسط البلد
البائعين القدامى فى القاهرة لسه مُصرين أن القديم مافيش أحسن منه، وإحنا موافقين على الكلام ده. معرض بصريات “ثريا مصطفى” فى وسط البلد بـ يخلينا مشدودين دائمًا بكمية النظارات الكلاسيكية الرخيصة اللى خلتنا نتفرج لساعات.
المحل مكانه بعد بار “الحرية”، وحسب كلام مسئولة المبيعات اللطيفة إيمان رأفت أن ده أول محل للنظارات يفتح فى القاهرة واللى فتحه هما جدودها لما اختاروا مكانه من حوالى 70 سنة. مُعلق على الحائط صورة جدها وهو لابس كاسكيت من موضة الخمسينيات مغطية جوانب وجهه.
فى سنة 1968، ثريا مصطفى والدة إيمان تولت المسئولية، ورجعت مهنة العائلة من جديد بعد ما حطت اسمها وبصمتها عليه من ناحية الجودة، والنظارات المستوردة من أحدث الماركات العالمية زى جاك فاث Jacques Fath، وموريل كوتيه Morel Cottet وجاى لاروش Guy Laroch.
مجموعة ثريا الكبيرة من الإطارات الأصلية من أزمنة مختلفة لدرجة أنها بطلت تنزل، بس هى لسه بـ تُباع عندها لحد دلوقتى. نظارة دايتونا كوتيه من الثمانينات، اللى لو طلبتها أون لاين هـ تكلفك مئات الدولارات، سعرها عندها 275 جنيه؛ وواحدة ثانية جاى لاروش بـ 150 جنيه بس.
وعلشان تمشى مع الموضة مجموعة ثريا مصطفى بـ تغطى مجموعة من النظارات من الأفياتور والواى فاريرز wayfarers لغاية نظارات المغنى جون لينون المدورة المميزة. لو عاوز شكلك يبدو واحد ذكى، أو واحد ماشى مع الموضة أو حتى تاجر مخدرات، ثريا مصطفى هى المكان المناسب.
أي موديل ممكن يتجهز لك سواء بعدسات خاصة، عدسات طبية، عدسات بـ تغير لونها في الشمس، أو حتى عدسات مصبوغة بألوان كلاسيكية، واللى بـ يشتكوا من قصر أو طول النظر يقدروا يروحوا عند ثريا مصطفى بنظارتهم القديمة وهم هـ يقيسوها ويضبطوا العدسة من غير كشف نظر جديد وبـ تجهز فى حوالى ساعتين.
خلال زيارتنا، إيمان قدمت لنا نصائح قيمة وصادقة من غير أى غرض هدفه أننا نشترى أكثر. بعد ثلاث ساعات من خلع ولبس نظارة وراء نظارة لدرجة أنهم خلونا نروح على كاونتر العرض علشان نختار بنفسنا، إحنا كنا فعلاً مفتونين بالمعروضات ونفسنا نشترى كل الموجود، وأخيرًا فاصلنا في خمس نظارات إيطالى وفرنساوى كلهم بـ 650 جنيه، من ضمنهم نظارة ماركة لاكوست وعلى ستايل الواى فاريرز ذراعها رخامى لونه أزرق مخضر سعرها 350 جنيه. بصراحة ما قدرناش نقاوم.
بأسعار تبدأ من 75 جنيه لقطعة مناسبة ومريحة، وتسليم فى نفس اليوم، هـ تفضل ثريا مصطفى هى المناسبة لرغباتنا فى حدود الميزانية. علشان كده لازم تزور المكان وتشوف المجموعة الكبيرة، بس لو سمحت، خذ وقتك وحاول ما تشتريش كل الموجود.

نصيحة 360

خذ وقتك، وفاصل جامد.

أحسن حاجة

تشكيلة كبير من القطع الكلاسيكية اللى لا تقدر بثمن بأسعار مدهشة ومناسبة.

أسوأ حاجة

مع الاختيارات الكثيرة قوى، غالبًا هـ تدفع كثير.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح