The Definitive Guide to Living in the Capital , Cairo , Egypt

فورتين – Fourteen

فورتين: أحذية أساسية وشنط يد جميلة في مصر الجديدة

تم التقييم بواسطة
Basma Mostafa
قيم
قيم الآن
فورتين: أحذية أساسية وشنط يد جميلة في مصر الجديدة

لو بـ تدوري على محلات أحذية فـ كايرو فيها محلات كثيرة جدًا
شاملة كل الأنواع، ترضي جميع الأذواق، وتناسب كل الميزانيات. لكن أن أنت تلاقي
جزمة تناسب ميزانيتك، وتِعَمَّر معاكي كام شهر، وكمان شكلها ستايل، فده موضوع صعب
جدًا.

محل «فورتين – Fourteen» في شارع بطرس غالي في
روكسي، مصر الجديدة، بـ يقدم عروض حلوة جدًا من الأحذية المتنوعة بجودة متوسطة وفي
متناول اليد. من ناحية التصميمات «فورتين» مش عنده أحلى الستايلات ولا حاجة، لكن
لو عاوزين حاجة أساسية ومعقولة يبقى أكيد هـ تلاقوا هناك حاجة تناسبكم.

وقت ما رُحنا كانوا لسّه منزلين تشكيلة الشتوي، أحذية البوت
كانت محتلة المحل بكل أشكالها وألوانها. كان فيه بوت جلد لغاية الركبة بـ 185
جنيه. «فورتين» عنده كمان بوتات قصيرة بتصميمات وألوان متعددة. لقينا هناك واحد
قصير وبكعب عالي لونه بيچ بـ 110 جنيه. أما تقليد بوتات الأجز UGGs كانوا موجودين بأسعار
تبدأ من 170 جنيه.

الأحذية المفتوحة من الأمام بكعب عالي (95 جنيه) متوفرة باللون
الأبيض، البني، وألوان ثانية أساسية. كان فيه واحد بشريطة ولونه تركواز بـ 79
جنيه.

بالنسبة لتشكيلة أحذية الباليرينا (السحافي)، فيه كذا
موديل مطرز وبـ تبدأ أسعارهم من 65 جنيه. أما الصنادل السواريه كانت متوفرة بألوان
زاهية زي الذهبي، والفضي، والفوشيا، والأسود اللامع (أسعارهم تبدأ من 110 جنيه).

المحل كمان عنده مجموعة رائعة من شنط اليد الصغيرة منقوش
عليها بالخط العربي، وأسعارها بـ تبدأ من 60 جنيه. كان فيه واحدة عليها رسمة جلد
النمر بـ 95 جنيه.

إحنا عجبنا جدًا شنطة عليها فرو أسود صناعي (89 جنيه)
وأكسسواراتها باللون الذهبي، لكننا ما جبنهاش لأنها صعب تبقى عملية في الشارع
المصري.

فيه شنط بالجنب صغيرة وعملية (55 جنيه) ومتوفرة بألوان
متعددة، منها الرمادي الغامق، والبني، والبيچ. الأحزمة الجلد الصناعي كانت بـ 55
جنيه.

شنط السهرة الستان كانت متوفرة هناك باللون الذهبي
الهادىء، والفضي، والبني، والأسود. بسيطة وتصميماتها شيك، ورأينا أنها من أحلى
الشنط اللي لقيناهم في البلد.

في آخر المحل كان مدفوس مجموعة من موديلات البوتات
والشباشب بتاعة الموسم الأخير بأسعار تبدأ من 25 جنيه لشبشب بسيط.

رغم أنه مش أول مكان ممكن تتوجهوا له وأنتم بـ تدوروا على
أحذية جودتها حلوة، لكن لو محتاجين حذاء مُريح وشكله حلو وفي نفس الوقت عاوزين
حاجة سعرها مش غالي، يبقى أكيد «فورتين» اختيار كويس يستاهل أنكم تلقوا نظرة عليه.

نصيحة 360

محل «فورتين» عنده موقع على الإنترنت.

أحسن حاجة

تصميمات كثيرة من الأحذية بأسعار معقولة.

أسوأ حاجة

ركنة العربية صعبة شوية في شارع بطرس غالي.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح