The Definitive Guide to Living in the Capital , Cairo , Egypt

تسوق

كايرو بوليتان.. أحلى مكان في القاهرة تشتري منه منتجات من علامات المدينة

بلوك نوت جاردن سيتي شموع علامات المدينة كايروبوليتان منتجات فنية منتجات من القاهرة ورقة بفرة
كايرو بوليتان.. أحلى مكان في القاهرة تشتري منه منتجات من علامات المدينة
بواسطة
Cairo 360

من الحاجات اللي بنحبها في القاهرة هو وجود بعض الأماكن اللي بتقدم لنا منتجات غير تقليدية.. منتجات مبهرة.. بتخلي حياتنا أجمل.. وبتتسبب في انبساطنا.

من الأماكن دي “كايرو بوليتان” اللي موجود في جاردن سيتي واللي بيقدم منتجات من علامات المدينة المميزة.

يعني مثلًا كلنا بنشوف عامل البناء وهو بيبني مبنى وبيستخدم الطوب الأحمر، كايروبوليتان حولوا الطوب ده لمنتج فني مبهر.. عبارة عن علبة مناديل تحطها على مكتبك أو في عربيتك وتخلي الكل يفتكر إنه قالب طوب حقيقي.

المكان فيه منتجات هايلة الحقيقة.. زي مثلًا نص رغيف عيش بلدي من اللي بنستمتع بأكله خصوصًا لما نطلب “شقة فول” من أي عربية فول أصيلة في القاهرة.. نص الرغيف هتشوفه في كايرو بوليتان محفظة. ومن كتر الدقة هتحس إنك عاوز تاكله.

ده غير بقى بلوك نوت على شكل ورقة بفرة، ومخدة على شكل غلاف البرشام الريفو. وعندهم كمان بلوك نوت على شكل تذكرة الأتوبيس.. وشموع على شكل صابون نابلسي شاهين وحديد أوزان الميزان.

وعجبتنا جدًا هناك مقلمة على شكل علامة تاكسي القاهرة مكتوب عليها أجرة.

شوفنا تفاصيل جميلة في المكان زي التوكتوك.. ربع رومي.. ربع حلاوة طحينية.. حاجات هتخليك تقدر تصنع عالم خاص بيك فيه كل التفاصيل اللي بتحبها في المدينة.

والأسعار مناسبة جدًا.. شوفنا منتجات تمنها 25 جنيه بس، ومنتجات تانية بيوصل سعرها ل250 جنيه.

عنوانهم سهل جدًا: 8 شارع دار الشفاء.. جاردن سيتي.. وسط البلد.

تقدروا تشوفوا كل المنتجات من هنا

وتابعوا صفحتهم من هنا

مقترح