The Definitive Guide to Living in the Capital , Cairo , Egypt

هارلي دافيدسون – Harley Davidson

هارلي دافيدسون: المكان الأنسب لمحبي الموتوسيكلات في الزمالك

  • 33 شارع إسماعيل محمد - الزمالك
  • سيارات
  • 0227351712
  • 10 صباحًا - 7 مساءً
تم التقييم بواسطة
Laila Rostom
قيم
قيم الآن
هارلي دافيدسون: المكان الأنسب لمحبي الموتوسيكلات في الزمالك

بانتشار موضة اقتناء الموتوسيكلات بين أهل كايرو، بل وتكوين مجموعات بين أصحاب الهواية نفسها، كان لازم نزور محل “هارلي دافيدسون – Harley Davidson” في الزمالك، لأنه أكيد عنده كثير يقدمه لمحبي الموتوسيكلات.

محل ماركة الموتوسيكلات الشهيرة مليء بأشهر موتوسيكلاتهم الكلاسيكية وأحدثها بإكسسواراتها وقطع غيارها؛ ده غير خط إنتاج للملابس اللي بـ تتماشى مع جو الموتوسيكلات (افتكر كده عمرو دياب في فيلم آيس كريم في جليم). ولمحبي التميز، هارلي دافيدسون بـ تقدم لهم الفرصة أنهم يعدلّوا في الشكل الخارجي للموتوسيكل لإضافة شكل مميز له.  

المحل مجهز بمجموعة من الترابيزات العالية والكراسي اللي تشجع على إقامة حوارات لطيفة على الماشي بين محبي الدراجات. وبما أن عالم الموتوسيكلات ده متشعب وعميق، ومليء بالأنواع والفئات المختلفة، هارلي دافيدسون سخرت الدور الأول لعرض الأنواع المختلفة من الموتوسيكلات علشان اللي ناوي يشتري يتفرج ويعرف أنسب موتوسيكل له، وده بمساعدة المسئولين عن البيع، واللي كانوا غاية في اللطف، وعلى أتم الاستعداد للرد على أي استفسار.

أصغر وأسهل موديل في التحكم اسمه The Sportster بمحرك سعة 883 سي سي، واللي سعره (10.000 :70.000 جنيه). والموديل ده فيه منه لونين: الأسود والبيج المموه (زي ملابس الصاعقة، فاكر الموضة دي؟). أشهر الفئات وأرقاها اسمها Dyna من ضمنها موديل Fat Bob بلونه الأبيض اللؤلؤي، محركه سعة 1585 سي سي، وكمان موديل Wide Glider بلونه الأسود المميز برسوم شُعلة اللهب، وأسعارهم (110.000 :190.000 جنيه).

تخيل لما قوة هارلي دافيدسون وبورشا تتحد في صورة مجموعة VRSC، ومن ضمنها موتوسيكل Night Rod برتقالي وأحمر بمحرك سعة 1250 سي سي (نفس سعة محرك سيارة صغيرة، تخيل!)، وموتوسيكل V-Rod باللون الذهبي مع رسوم للهب أسود، وأسعارهم (205.000 :209.000 جنيه).

من الموتوسيكلات الكلاسيكية الموجودة فئة اسمها Soft – Tail Family معروفة بشكلها الأنيق. معروض منها موديل Springer بمحرك سعة  1700 سي سي، وموديل Black Fat Boy (اسم عنصري!) بمحرك 1700 سي سي، أسعارهم بـ تصل حتى 200.000 جنيه.  

أكثر  الفئات اللافتة للانتباه هي The Touring اللي سعة محركها تصل لـ 1700 سي سي، منها موديل Road King ونفس الموديل، ولكن المستعمل منه، وأسعارهم تصل حتى 200.000 جنيه.  

الدور الثاني من المحل مخصص للملابس الرجالي، والحريمي وللأطفال. وبـ يضم مجموعة من الخوذات، والبوتات والجاكيتات الجلد، ده غير التي شيرتات والقفازات (لازم تسوق وأنت شيك برضه).  الخوذات لها أنواع، النصفي (الشبيهة بخوذة جندي الجيش) سعرها (1200: 2000 جنيه)، اللي بـ تغطي معظم الرأس (1800: 2300 جنيه)، والخوذة الكاملة اللي لها واقي أمامي (2000: 3500 جنيه). البوتات اللي رقبتها عالية (2000: 2500 جنيه) واللي رقبتها أقصر (1400: 1800 جنيه). القفازات (500: 1000 جنيه)، والنظارات (1300 جنيه)، الشنط (960 جنيه). ده غير أن بـ يباع شمع لتلميع الموتوسيكل. الجاكيت الجلد الشتوي (4000: 5000 جنيه)، أما الصيفي (2000 جنيه).

في المجمل، التجربة ممتعة وبالذات لو أنت من محبي الموتوسيكلات، وهـ تنبسط أكثر لما تعرف أنهم بـ يقدموا تجارب قيادة مجانية للموتوسيكلات.

نصيحة 360

كل يوم جمعة بـ يقام إفطار مجاني بالمحل.

أحسن حاجة

هارلي دافيدسون بـ يقدم لك طرق مختلفة وسهلة  للشراء، ادفع 20% ثم قسط الباقي على 3 سنين.

أسوأ حاجة

بعض الإكسسوارات والملابس سعرها مبالغ فيه.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح