The Definitive Guide to Living in the Capital , Cairo , Egypt

هيبز بوتيك الموجود فى الدور الثانى فى فيرست مول الأنيق، داخل فندق الفور سيزونز فى الجيزة أكيد هـ يشد انتباهك بعرضه الزجاجى لمجموعة من المنتجات الجذابة. افتتحت المصممة هبة العوضى “هيبز بوتيك – Hebz Boutique” أول السنة بعد ما بدأ عدد كبير من المشاهير يلبسوا من تصميماتها. ورغم أنه محل صغير لكنه مليان بمجموعة من أجمل خطوط الموضة من الماركات المتنوعة؛ المنتجات الموجودة منها المجوهرات، وشنط اليد، والأحذية، والإكسسوارات ومجموعة صغيرة من ملابس السيدات والأطفال.

هيبز كمان عندها مجوهرات للمناسبات الرسمية لما يبقى ضرورى أنك تتألقى على الآخر. شد انتباهنا زوج من الحلقان كبير شكله تحفة ومغرى من الماس التقليد سعره حوالى 1100 جنيه. زوج ثانى مش فخم زى اللى فات سعره يعتبر معقول أكثر (440 جنيه). كمان فيه مجموعة من العقود والخواتم، شوية منهم لامعين ومبهرين وشوية رقيقين وحساسين، تقدرى تكملى بهم أى مجموعة أزياء. زوج ثانى على شكل أزرار صغيرة بس رائع ينفع للنزول كل يوم وسعره ممتاز (180 جنيه).
تحت الترابيزات تلاقى مزيج من أحذية باليرينا ماركة سفير مصنوعة من الجلد بألوان كثيرة، وأحذية صيفى ثانية مفتوحة من المطاط، وبرضه مزينة بالأحجار الكريمة (350 جنيه: 550 جنيه). باليرينا سفير هـ تكلفك 440 جنيه؛ وواضح من شكلها أن جودتها كويسة وبـ نخمن أنها كمان مريحة جدًا.

لو كل ده ما يكفيش أنك تبقى لابسة زى المشاهير، عندهم كمان شوية نظارات شمس للبيع، أسعارها تتراوح بين 1400 جنيه لغاية مبلغ ضخم هو 5100 جنيه.
شوفنا كمان حاجات ثانية زى تي شيرتات برسومات مضحكة، وملابس أطفال، وكفرات أى فون، وشموع وفواحات. الموظفة الوحيدة فى المكان كانت لطيفة ومش بـ تتدخل إلا لو احتاجنا مساعدة.
“هيبز بوتيك” لا هو غالى قوى ولا رخيص قوى، وتصميماته كلها  غريبة ومش تقليدية وعلى أحدث صيحة، وكمان تقدرى تلاقى كميات كبيرة من المنتجات اللامعة والمجوهرات مناسبين لكل المناسبات. روحى على فيرست مول ودلعى نفسك بتجربة تسوق فريدة وهادى نفسك -أو حد ثانى- بحاجة روشة من إكسسوارات هيبز.