The Definitive Guide to Living in the Capital , Cairo , Egypt

تليفزيون
أسرار من تحت الكوبري

أسرار من تحت الكوبري: عودة متوسطة القوة لطوني خليفة على القاهرة والناس

  • طوني خليفةطوني خليفة
  • توك شو
  • من الآن
  • وائل ناصفوائل ناصف
تم التقييم بواسطة
Cairo 360
قيم
قيم الآن
أسرار من تحت الكوبري: عودة متوسطة القوة لطوني خليفة على القاهرة والناس

بداية قوية جدًا، ده اللي نقدر نقوله عن الطريقة اللي بدأ بها طوني خليفة برنامجه الجديد على قناة القاهرة والناس “أسرار من تحت الكوبري”، في الأول ما عجبناش الاسم، حسينا أنه بـ يرمز لشيء من الابتذال وجذب الانتباه، وزاد شعورنا ده مع الحلقة الأولى اللي أظهرت طفلين تم اتهامهم أنهم من آكلي لحوم البشر، لكن لما شوفنا حلقات ثانية حسينا أنالبرنامج فيه نقط إيجابية مش في أي برنامج ثاني.

الجري وراء الحاجات الغريبة مش هو بس هم البرنامج، لكن كمان في محاولة لإبراز حالات بـ تبعد عنها برامج ثانية بدعوى أنها عادية، يعني لما يطلع شخص عاوز يبيع كليته علشان محتاج، ولما يكون الهدف من ظهور الطفلين هو محاولة الوصول لعلاج أو طبيب يتفهم الحالة ويتابعها.. كلها أهداف سامية مش بـ تقف بالفقرات عند حد إثارة الجدل وخلاص.

لكن لما بـ نبص لتاريخ طوني خليفة وتاريخه القوي مع برامج التوك شو، بـ نحس أن “أسرار من تحت الكوبري” شيء مختلف تمامًا، ونقلة اختار بها المذيع اللبناني المشهور الانتقال من مرحلة المحاورات السياسية لمرحلة ثانية قائمة على الجانب الاجتماعي البحت، وإن كان ده شيء مش جديد على نوعية البرامج اللي اعتاد تقديمها في لبنان لكنه جديد علينا كمصريين، شوفناه في برامج زي “زمن الإخوان“، و”الشعب يريد“، و”بلسان معارضيك”، و”لماذا”، صحيح هو بدأ بترك الجانب السياسي بداية من رمضان اللي فات لما عمل برنامج “السلام عليكم” لكنه في الوقت نفسه كلل رحلته دي مع برنامج “أسرار من تحت الكوبري”.

البرنامج بـ يختار الأمور الغريبة وغير الطبيعية، زي البنت اللي بـ تحب ترسم التخان، والست اللي بـ تمارس الغوص كأول غواصة وزنها ثقيل في العالم العربي، وغيرها من موضوعات تشد المشاهد وتخليه يقعد يتفرج لآخر الحلقة، بعض الفقرات بـ يكون درامي جدًا يخلي المشاهد يبكي، وبعضها دمه خفيف ومضحك، وبين ده وده بـ يقف طوني خليفة كمذيع مجتهد لقى نفسه في مصر أكثر ما لقاها في لبنان.

لما بـ نرجع للبرامج اللي قدمها في لبنان بـ نلاقيها في معظمها ترفيهية بحتة زي “بـ تخسر إذا ما بـ تلعب”، و”الثالث ثابت”،و”أنت وحظك”، و”Take it or leave it” على تليفزيون دبي”.

المذيع اللي نجح في برامج الفن والترفيه والسياسة نجح كمان في البرامج الاجتماعية، ودليل النجاح التبادل الرهيب لفقرات البرنامج على الإنترنتخصوصًا الفقرة اللي تم فيها تنويمه بالفعل على الهواء وتخشب للحظات.

في بداية كل حلقة بـ يوضح طوني سر التسمية وبـ يبدأ الحلقة بالسير على كوبري كبير علشان يقول أن المسئولين بـ يعدوا من فوق الكوبري ماشيين فوقه على مشاكل وقصص الناس اللي موجودين تحت الكوبري، وأن دوره كبرنامج أنه يخرج بالأسرار الموجودة تحت الكوبري.

البرنامج عبارة عن ثلاث فقرات، أحيانًا بـ تكون الموضوعات المعالجة متشابهة، وأحيانًا بـ تكون مختلفة، في النهاية المجمل لطيف ننصحكم بمشاهدته!

عجبك ؟ جرب

برنامج "المستخبي"أو "تيك توك" على القاهرة والناس.

نصيحة 360

البرنامج ظريف للناس اللي عاوزة تفصل من السياسة لكنه صادم أحيانًا لذلك وجب التحذير، المخرج وائل ناصف، بـ يعرض  منه ثلاث حلقات جديدة أسبوعيًا أيام الأحد والاثنين والثلاثاء الساعة 9:30 مساءً ويوم الأربعاء حلقة مجمعة برضه الساعة 9:30 مساءً، لكن للأسف قناة القاهرة والناس مواعيدها غير منظمة فبـ يتأخر للساعة عشرة.

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح