The Definitive Guide to Living in the Capital , Cairo , Egypt

مكان
جديد فتح في الزمالك، مكان مريح نفسيًا لكن مستخبي شوية، يعني لو مش عارف هو فين
بالضبط عمرك ما هـ توصل له، لو كنت كسلان وعايز تتمرن أو تلعب ﭽيم، أو لو كنت مش
عاوز تبني عضلات ضخمة بتمرينات عنيفة، «أون ذا مات – On the Mat» ممكن يبقى المكان اللي بـ تدور عليه. ستوديو صغير متخصص في
اليوجا والتأمل والعلاج الروحاني أو (الريكي) الياباني، هـ تحس وكأنك في بيتك
ومافيش عليك أي ضغوط  وهـ تحب المكان جدًا.

على الناصية اللي بعد «ماندرين قويدر» في شارع شجرة الدر
هـ تلاقي المكان غير واضح على الإطلاق، وهو في الدور الأرضي في عمارة قديمة ومن
غير أي لافتات خارجية. وبعد استقبال حار وترحيب من العاملين بالمكان، هـ يطلبوا
منك تقلع الحذاء وتحطه في أول غرفة على شمالك وأنت داخل، ودي كانت غرفة الريكي
وكانت جدرانها مطلية بلون أرجواني فاتح مريح للأعصاب، زيها زي باقي جدران
الستوديو.

الغرفة
الرئيسية ممكن تكفي لحد 14 فرد، وكل واحد يكون له مساحة كافية علشان يتحرك ويتنفس
بشكل سليم، الغرفة الثانية على الشمال هي الاستقبال، مفروشة بالمخدات والمساند
ومزينة بالشموع، وفي الناحية الثانية من الستوديو هـ تلاقي الحمامات وغرف تغيير
الملابس للسيدات.

بمجرد
دخولك المكان فيه شوية قواعد لازم تتبعها، زي أن صوتك لازم يبقى منخفض على قد ما
تقدر، وتقفل تليفونك أو أي جهاز معاك ممكن يسبب إزعاج، وما ينفعش تحط عطر قوي
ورائحته نفاذة، ولازم تساعد في أي حاجة مطلوبة بعد انتهاء الجلسة. لازم كمان تقول
للمدرب أو المرشد لو عندك أي إصابة تمنعك من أنك تعمل وضعيات معينة أثناء التمرين.
كل المدربين حاصلين على شهادات معتمدة في المجال ده لما سافروا الهند، وبـ يتبعوا
نمط حياة صحي مثالي. المدربين بـ يركزوا على وضعيات جسمك أثناء التمرين ولو ضروري
هـ يعدلوا من وضع اليوجا اللي أنت عامله لو كان غلط، وهـ يحاولوا يخلوا جسمك في
أحسن حالة استطالة للعضلات.

لو مش
بـ تحب اليوجا قوي، «أون ذا مات» بـ يقدم مجموعة متنوعة من الأنشطة الجسدية
والذهنية زي الـ (تاي تشي Tai Chi) أو التأمل الحركي والـ (بيلاتس Pilates) هو نظام حركي لزيادة مرونة
الجسم، والتأمل العادي. في شهر أكتوبر هـ يبدأ ورشتين عمل في الستوديو وهـ يتم
الإعلان عن ورش ثانية في الأيام القادمة، الجدول بـ يتغير كل شهر لكن ساعات العمل
تناسب أي حد في أي ظروف.

أول
جلسة دائمًا هـ تكون مجانية، بعد كده ممكن تدفع 50 جنيه في الساعة، أو تشترك لمدة
10 جلسات بـ 400 جنيه (40 جنيه في الساعة). كل ورشة غالبًا بـ تستمر لمدة 3 ساعات
وممكن تُقسم لجزءين. الورشة مش بـ تزيد عن 10 أفراد وسعر الاشتراك بـ يكون 200
جنيه للفرد ولازم تحجز مكانك قبلها بفترة كافية. «أون ذا مات» له صفحة على الفيسبوك
ممكن
من خلالها تتابع كل الأحداث الخاصة به أول بأول.