The Definitive Guide to Living in the Capital , Cairo , Egypt

كلنا بـ نحب منظر الـﭼـيم
الواسع اللي فيه صف مشايات كتير وأجهزة وستوديو واسع لليوجا، بس أكيد مش بـ نحب
أنه يضحي بحاجة عشان خاطر التانية. في «جمعية اللياقة البدنية والرقص Fitness & Dance Associations»
هـ تلاقي الحاجتين واخدين حقهم.

المركز واخد آخر دورين في
مبنى «اليمامة سنتر» في الزمالك، فيه أوضتين فيهم مشايات عادية ويدوية وسلالم
التدريب « Stairs masters»
والعجلات الثابتة وفي مساحة كبيرة لتدريبات الأحمال والمعدات بتاعتها. الدور
السفلي مخصص للأمانات والدواليب وفيه ستوديو الرقص واليوجا وعجلات التدريب والـ «سبا
Spa»
وده المقصود بيه السونا وأوضة البخار.

فيه كمان زي صالون ترفيهي
فيه ترابيزة بلياردو وبيبي فووت أو «Football» وألعاب تانية لأي حد مكسل
يتدرب شوية.

المعدات في «إف دي إيه»
متوفرة بس قديمة شوية. الـﭼـيم تقريبًا مفروش بأجهزة التدريب المتعددة الاستخدامات
اللي اسمها « Cybex»،
بس مش الموديلات الحديثة قوي اللي فيها شاشة تليفزيون خاصة، وده في الحقيقة مش مهم
أصلاً. بس عشان ماتركزش قوي في التدريب المرهق؛ عاملين شاشات صغيرة على الحوائط
شغالة من غير صوت، وفيه مزيكا عالية شغالة في الخلفية عشان تحمسك للتدريب.

أوضة التدريب بالأوزان هي
الحاجة المُميزة للـﭼـيم، على الأقل جهازين دائمًا فاضيين من الأجهزة اللي ممكن
تحتاجها، يعني مش هـ تقف تستنى دور أبدًا. المكان اللي فيه الأوزان ضيق شوية بس
مترتب والمعدات مرصوصة فيه بشكل كويس.

الـ«سبا» الصغير فيه حوض
دافئ وشوية غرف بخار وبـ تشتغل بجدول محدد حسب أيام الرجال والسيدات. لما دخلنا
السونا أُحبطنا جدًا بعد ما لاقينا مفيش أنوار والأجهزة مطفية ومفيش أي إرشادات عن
كيفية تشغيل نظام الحرارة في الأوضة. الإضاءة في الستوديو برضه كانت ضعيفة أو مقفولة،
وحسينا بكده أكتر عشان حصص التدريب بتاعتنا كانت في الشتاء والإضاءة عمومًا أقل،
وده ضايقنا جدًا خاصة أن مفيش مكان واسع لليوجا في الدور العلوي المنور أكثر.

«إف دي إيه» بـ يفتح يوميًا
من 6 الصبح لحد 1 بعد منتصف الليل. العضوية لدخول الـﭼـيم بـ تشمل الـ«سبا» وجلسات
اللياقة وجلسات خاصة مع مدربين المكان ومكان بالجراﭺ اللي في المبنى.