The Definitive Guide to Living in the Capital , Cairo , Egypt

المعادي بوجه عام معزولة إلى
حد كبير عن دوشة القاهرة المعتادة. إلى جانب أن المعادي فيها مجموعة من أحسن مطاعم
وصالات چيم القاهرة. لكن بالرغم من كده مراكز التجميل والكوافيرات اللي فيها قليلة
وغير كافية. واحد من مراكز التجميل دي «حمام التلات».

«حمام التلات» مغربي-
تايلاندي وما تتوقعش إنه يبقى زي «حمام الأربع» بتاع بولاق في أي ناحية من
النواحي. خاصةً من ناحية الأسعار.

أول حاجة بـ ننصحك بها في
الحمام أكيد الحمام المغربي (270 جنيه). للي ما جربهوش قبل كده الحمام المغربي
تجربة مؤلمة! لكن اللي عارفينه إنه بـ ينظف الجسم ويرجعه ناعم نعومة جلد الأطفال.
ده غير أن «حمام التلات» -على وجه الخصوص- بـ يكون القائمين عليه عارفين هما بـ
يعملوا إيه كويس، وبـ يعملوا الحمام المغربي على أصوله. اللي بـ يحصل أن خبيرة
التجميل في المكان بـ تأخذك إلى غرفة فيها ترابيزة، وبـ تطلب منك تنام عليها.
وبعدين بـ يعرضوا جسمك كله (بالمعنى الحرفي للكلمة) للبخار السخن المطهر والمنعش،
وبعدين بـ يدعكوا الجسم تمام بصابونة زيت زيتون، وبعدين بلوفة (بـ تشتريها من على
الكونتر وانت داخل). بعد ما يكون جلدك اتهرى على الآخر، بـ يدهنوه بكريم رقيق برائحة
المشمش علشان يهدئ الجلد ويرطبه. الحمام ده بـ يأخذ حوالي ساعة محتاجة شجاعة واحتمال.
ده غير أنك لو بـ تتكسف (لأن الجسم كله بـ يتغسل) ممكن تتضايق شوية. لكن في
النهاية، إحساس النظافة الاستثنائية، والنعومة الحريرية، يستحق التعب.
على قد ما الحمام رائع، ماسك الوجه (200 جنيه) سيء. المفروض أنه 60 دقيقة من تنظيف
مسام الجلد وترطيبه. ومع ذلك خبيرة التجميل قضت أقل من 10 دقائق فى تنظيفه، وسابت
الناقدة 15 دقيقة علشان “تسترخي وتستجم”، وماكنتش شايفة له معني أبدًا.
وبعدين بدأت في نصائح مالهاش معنى ومش عملية زي “اغسلي وشك كل يوم بالمياه
المعدنية” أو “حطي خيار على جلدك بالليل”! وبالرغم من أن الناقدة
شعرت أن وشها فعلاً ظهر عليه أثر الماسك، إلا إنه بعد ساعات قليلة كل أثر اختفى!

أحلى حاجة في «حمام
التلات» هي «رشيدة» خبيرة تجميل مغربية بـ تعمل أحسن وأسرع جلسة إزالة شعر
(بالشمع). لما تتصل عشان تحجز أطلبها بالاسم، لو رحت في أي وقت من غير حجز ممكن
تبقى غير موجودة. ولجلسات إزالة الشعر بالحلاوة أطلب «سعاد» بالاسم، دمها خفيف وكفء
وسريعة جدًا. علشان جلسة للجسم بالكامل هـ تدفع من 175: 215 جنيه. «سعاد» كمان شاطرة
أوي في عمل الحواجب (35 جنيه). 

الحمام كمان بـ يقدم
جلسات تدليك سويسرية وتايلاندية، ومجموعة مشكلة من الحمامات (أو حمامات الفَرك «Scrub»)
بروائح مختلفة منها جوز الهند، والڤانيليا والشوكولاته. كل ده بجانب حمامات الكريم
للشعر والمانيكير والباديكير (بـ يستخدموا منتجات «OPI» الإنجليزية).