The Definitive Guide to Living in the Capital , Cairo , Egypt

نظريًا مافيش حاجة مريحة أكثر من أن الواحدة تقضي يومها
في صالون للتجميل وتسيب نفسها للتدليل والراحة. فيه إعلانات، وبروشورات، وأفلام كثير
قوي بـ تروج للفكرة دي، كل اللي الموضوع محتاجه أنك تستريحي وتسيبي نفسك لشخص يأخذ
باله منك. طبعًا إحنا عارفين أن الواقع غير كده، لأن جملة “مافيش جمال من غير
ألم” ما جاتش من فراغ.

مع اقتراب الصيف حسينا أنه من الضروري نروح صالون تجميل
نضبط نفسنا، وقررنا نجرب صالون «كريس» الموجود في ميدان أسوان في المهندسين أمام “جوتيه”
و”تورنادو”. كريس له فروع كثير في القاهرة ويعتبر من الأسماء الكبيرة في
عالم التجميل.

مدخل الصالون مبهج جدًا ولونه أبيض مبهر، فريق العمل اللطيف
بـ يساعدك من أول ما بـ تدخل، الدور الأرضي للرجال فقط، وقص الشعر بخمسين جنيه، في
حين أن الدور العلوي للستات بالكامل، فيه عدة طرق لإزالة الشعر: بالشمع أو السكر
والليمون. الإزالة بالشمع (45 جنيه). أما بالنسبة لاستخدام السكر والليمون (70
جنيه). فيه دش موجود للاستحمام، قدموا لنا فوطة ننشف بها، ورغم أن المكان ككل نظيف،
إلا أننا لاحظنا وجود شوية شعر على الأرض وفي الفوط.

بعد ما خلصنا قررنا نعمل باديكير (50 جنيه)، خصوصًا أننا
في موسم الشبشب (الصنادل والشباشب المفتوحة)! داخل قسم الباديكير والمانيكير فيه
كرسيين للباديكير وكراسي للمانيكير، التصميم بتاعها كان روش جدًا وممكن نقول أنه
من ألطف الكراسي اللي شفناها في صالون تجميل.

الباديكير بدأ بطبق دافيء ولطيف، بعدها مرينا بـ تقشير
للجلد، تلميع للأظافر، وتنظيف للمناطق المحيطة بها. ورغم أننا كنا عاوزين نلون أظافرنا
إلا أنهم نصحونا أننا ما نعملش كده علشان ما كناش لابسين شبشب مفتوح. ورغم أننا ما
عملناش شعرنا، إلا أننا لاحظنا أن الستات اللي خارجين من عند الكوافير هناك كان
شكلهم حلو جدًا.

كريس كمان عنده محل صغير ممكن تشتري منه أدوات تجميل زي
الشامبو والبلسم، والسيشوار ومصففات الشعر، وبنفس الماركات اللي بـ يستخدمها
الصالون زي “تشي” و”لوريال”.

مع وجود فريق لطيف وخدمة كويسة، إحنا أكيد ما عندناش
مانع نزور كريس ثاني.