The Definitive Guide to Living in the Capital , Cairo , Egypt

صحة ولياقة
محمد علي كلوب

محمد على رويال كلوب: أجازة هادئة فى ضواحى القاهرة

  • الكيلو 13 طريق الصعيد الزراعي
تم التقييم بواسطة
Marcus Benigno
قيم
قيم الآن
محمد على رويال كلوب: أجازة هادئة فى ضواحى القاهرة
بالنسبة لكثير مننا ثورة 25 يناير كانت بـ تمثل لمحة من الأمل. لكن بالنسبة لماجد فرج الثورة لا يمكن تكون مصدر للأمل ودفع ثمنها غالى.

وبـ يقول المتمرس السياسى وصاحب “محمد على رويال كلوب” الموجود فى الجيزة فى حواره مع كايرو 360: “أنا كنت بـ أروح ميدان التحرير كل يوم وكنت مع التغيير، وكنت متضايق من الحكم العسكرى اللى قعد 60 سنة. لكن دلوقتى أقدر أقول يا ريت الثورة ما كانتش حصلت. ثورة بدون قائد، ولا جدول أعمال أو حتى خطة هـ تسبب تدمير مش بناء”.

وزى ما فرج قال أن فى اليوم المدعو بـ “جمعة الغضب” بعد أول أيام الثورة السنة اللى فاتت، اقتحم حوالى 600 واحد معاهم سلاح آلى وأسلحة ثانية محمد على كلوب اللى بقاله حوالى 15 سنة وسرقوا كل حاجة.
وبـ يكمل فرج “سرقوا أى حاجة ممكن تتسرق ودمروا أى حاجة ما قدروش يسرقوها”.
النادى المشهور، اللى قعد 12 سنة يتبنى ولعوا فيه وكسروا رخام الأرض. بعد المدخل مباشرة، بواقى العربيات الأثرية اللى حُرقت من مجموعة فرج منها عربية بنتلى، موجودة كشاهد على اليوم المشئوم.
النادى فضل مقفول لمدة سنة لغاية ما افتتح من جديد شهر مايو اللى فات. واحتفالاً برجوعه، الفرقة اللبنانية المشهورة “مشروع ليلى”، قدمت حفلة لعدد كبير من الجمهور. ولحد دلوقتى النادى لسه تحت الترميم، لكن حمام السباحة وباقى المنشآت شغالين بكامل طاقتهم.
وعلق زبائن المكان وقالوا: “مقارنة بنوادى ثانية، محمد على كلوب ما يعتبرش نادى رياضى بالمعنى المألوف، هو مكان أكثر للراحة، والتمتع بأجازة هادئة بعيدًا عن الشوارع الزحمة وحياة المدينة الروتينية الكئيبة، أو بمعنى آخر هو مهرب من مصر موجود فى مصر”. على ضفاف النيل، النادى بـ يفخر أنه بـ يوفر جو لطيف فى الجزيرة المغطاة بالنجيلة مع موقع تحفة بـ يطل على مشهد كامل للمدينة العريقة، واللى بـ يساعد الزوار أنهم يتمتعوا بأنشطة مسلية زى التخييم وركوب المراكب. الخيم والمراكب والفلوكة موجودين تحت الطلب.
لكن المميز فى محمد على كلوب عن باقى النوادى هو الجو المتحرر والسياسة الصارمة الشديدة اللى بـ تمنع المضايقات أو التحرشات.
وأكد فرج على النقطة دي: “هنا المكان الوحيد اللى تقدر فيه أى واحدة تمشى بالبكينى لوحدها، وتنزل حمام السباحة وتخرج منه، وما حدش يقدر يبص عليها. ممكن أتغاضى عن أول مرة، لكن لو تكررت ثانى هـ يبقى ليا تصرف ثانى. مش مسموح عندى فى النادى أى نوع من المضايقات”.
بجانب وجود DJ موجود على حمام السباحة طوال اليوم، محمد على كلوب بـ يقدم حفلة صاخبة عليه كل يوم جمعة. والموضوع مش هزار. والحفلة بـ تكمل بوجود للمشروبات مع أكلات لذيذة مخصوصة على حمام السباحة زى البرجر والبيتزا بأسعار معقولة.
لو دماغك بعيدة عن الأغانى الشعبى، محمد على كلوب بـ يشجعك أنك تروح على الكوبرى اللى بـ يوصل للجزيرة الخاصة بالنادى، جو من الهدوء تحت ظل صفوف الشجر والمياه اللي بـ تمر من تحت رجلك بمعنى الكلمة. هنا، قعدة بسجاد ومخدات بـ ترحب بك علشان تشرب شيشتك ومشروبك المفضل، وده فعلاً أحسن مكان تستمتع فيه بمنظر النيل فى النهار.
إضافة للنادى نفسه، محمد على كلوب فتح حديثًا M/S Nile Story، ودى مركب عائمة راسية على الشاطئ الخاص بالنادى. بـ 400 جنيه فى الليلة لفردين تقدر تستخدم غرفة فاخرة ومعاها بوفيه للإفطار مع استخدام الجيمانيزيوم والساونا وكمان استخدام كل وسائل الراحة والترفيه فى النادى. الحق يقال دى صفقة ناجحة.
غير كده، العضويات العادية فى النادى بـ تُجدد كل سنة، وتكلفة الفرد فى السنة 4500 جنيه، وللزوجة 3500 جنيه، وللأطفال أقل من 18 سنة تكلفتها 2000 جنيه. سعر الدخول لليوم الواحد 150 جنيه ويشمل مشروبين هدية.
رغم أن الثورة سببت انتكاسة للنادى، لكن فرج مُصر أنه يقدم للقاهريين المكان الوحيد فى المدينة اللى فيه تكون براحتك وتستمتع بضوء الشمس بعيدًا عن عيون المراهقين والمعاكسات.
استمتع بآخر نسمات الصيف وروح مكان بعيد تفصل دماغك فيه، وفى نفس الوقت مش بعيد قوى عن بيتك.

نصيحة 360

ملحوظة: المكان بـ يقدم مشروبات روحية لأن غالبًا بـ يكون مرتاديه الأجانب.

أحسن حاجة

جو الحرية اللى فيه.. تقدر أى واحدة تلبس على راحتها من غير معاكسات بايخة.

أسوأ حاجة

التجديدات فى النادى بـ تخلينا نقعد بالخارج.

أكتب تقييم

أضف تعليقاً

يجب أنت تكون مسجل الدخول لتضيف تعليقاً.

مقترح