-
13 شارع الفردوس
-
مراكز ثقافية
-
Ahmed Abd El Gawad
لو أنت قاعد فى مدرجات الدرجة الثانية هـ تلاقى العرض أمامك.. ولو أنت قاعد فى مدرجات الدرجة الأولى هـ تلاقى العرض أمامك.. ولو أنت قاعد معانا دلوقت وإحنا داخل مركز دوم الثقافى برضه هـ تلاقى العرض أمامك.
الأول: فزورة دى يا معلم؟
الثانى: لأ، مركز دوم الثقافى.
ضحكة شريرة عالية.. نقطة ومن أول السطر.
إيه بقى الموضوع؟ هـ نقول لكم إيه الموضوع.. كوبايتين شاى وقعدة كده تحت التكيف فى الحر ده وركز معايا.. المكان الرئيسى اللى بـ يعملوا فيه العروض عبارة عن مدرجات وفى المنتصف ساحة العرض المكان ده مش كبير لكن تقدر تشوف فيه عروض مختلفة جدًا.
المكان كله عبارة عن “فيلا” كل طابق له حكاية، فيه مكان للموظفين اللى بـ يبتكروا عروض دوم وفعالياته.. وفيه دور للورش.. ودور للتصوير والدور الأرضى تكلمنا عنه اللى بـ يتعمل فيه العروض.
“دوم” اسم غريب لمركز ثقافى لما تقعد كده وتسأل نفسك: يعنى ليه سموه “دوم”.. إيه علاقة الثقافة بالعصير؟ هنا نظهر إحنا ونقول لك.. الفكرة قائمة على عصير الثقافة اللى بـ يجمع حاجات كثير مع بعض علشان يقدم فكرة.
والفكرة بـ تتعمل تحت اسم عصير دوم وهو عرض فنى وثقافى، بـ يبقى يوم الأربعاء وبـ يناقش قضية من القضايا اللى بـ تلعب على أوتار المجتمع المصرى. عصير دوم هو طرح أسئلة، وغناء، وتمثيل، وشهادات، وحكي، وأفكار، وحديث داخل خلاط من تبر النيل. عصير دوم مش بـ يدور على إجابات فالحقيقة لها ألف وجه، ولكن أملهم أن شربه يكون مفيد للعقول.
أما سبت الفنون فهو يوم للفن، هـ تلاقى فيه عروض مسرحية، وشعرية، وغنائية، ورقص، وعروض موسيقية، وعروض كتب.
وفيه كمان مدرسة دوم للكاريكاتير وهى مدرسة لتعليم فن الكاريكاتير للفنانين ورسامى الكاريكاتير المتقدمين فى المستوى مش للمبتدئين، والهدف من المدرسة دى هو صناعة الفنانين رسامى الكاريكاتير، وتزويدهم بالخبرات والتفاصيل الفنية الدقيقة للوصول للاحتراف، وعلى فكرة بـ يبدأ العام الدراسى الأول فى أول أكتوبر 2013 وينتهى فى نهاية يونيو 2014.
ولأن المصريين من زمان اشتهروا بفنون القماش، واللى كانوا بـ يسموه زمان “المرج خيط” أو الرسم بالقماش.. واللى هو فن لتدوير القماش القديم وتحويله إلى لوحات تشكيلية. وهـ تبدأ مؤسسة دوم بعمل ورش لتعليم فن المرج خيط، وخطتها نشر الفن ده فى كل القرى المصرية.
وفيه كمان فن النحت بالسلك واللى هـ يعلم الناس إزاى يأخذ المقاسات بالسلك ويصنع أشكال كثيرة ولوحات فنية عجيبة.
أما “باختصار” مشروع عبارة عن سؤال وهـ يتم الرد عليه من المتخصصين فى المجالات المختلفة كل واحد من زاوية رؤيته وتخصصه، وهـ يتحول الموضوع ده إلى سلسلة كتب يضم فيها خلاصة الإجابات عن كل سؤال، وهـ يتحول برضه لسلسلة فيديوهات هـ تتعرض على الإنترنت وهى لقاءات قصيرة مع المتخصصين هـ يقدموا من خلالها الإجابات. باختصار هو العديد من الإجابات عن كل سؤال.
