The Definitive Guide to Living in the Capital , Cairo , Egypt

خميرة – Khamera

خميرة: مخبوزات خفيفة وصحية بفرع جديد فى الشيخ زايد

تم التقييم بواسطة
Angie El Batrawy
قيم
قيم الآن
خميرة: مخبوزات خفيفة وصحية بفرع جديد فى الشيخ زايد

الإفطار أهم شيء فى يوم أى شخص مننا، هو طبعًا اللى بـ يمده بالطاقة وبـ يفتح نفسه على باقى اليوم إذا كانت جودته كويسة وطعمه مميز، فيه أماكن بـ تأفور أوى فى أسعارها، وبالتالى بـ تفضل رحلة البحث مستمرة عن مكان بـ يقدم إفطار باختيارات كبيرة، أسعار لطيفة، وجودة عالية.. وإحنا الحمد لله لقيناه.. “خميرة – Khamera”.

إحنا سبق وكتبنا عن خميرة لما فتح لأول مرة فى الزمالك، اتبسطنا منه جدًا وعرفنا أنه مشروع عائلى بـ يقولوا أنه بدأ سنة 1930، بـ يمد أماكن متنوعة بمنتجاته المحبوبة مع التوسع بفروعه حول القاهرة، وفتح كمان فرع فى المهندسين فى شارع لبنان، ودلوقت هو كمان فى الشيخ زايد جنب مطعم “فطيرة – Feteera” اللى كتبنا لكم عنه من فترة.

بيافطة برتقالى فيها كتابة لونها بنى تقدر تميزه من بعيد، المكان واسع من الداخل، توزيع المنتجات بتاعتهم وعرضها يغريك أنك تشتري المكان كله، عندهم عيش، ومخبوزات، وساندويتشات، وحلويات شرقية، ومقرمشات، وبسكويت، وكيكات، وجاتوهات وغيرها كثير، كل ده وأسعاره معقولة جدًا.

جربنا من عندهم حاجات كثيرة جدًا، غير أن طريقة العرض مغرية، الناس اللى هناك دمها خفيف وودودين جدًا ووجههم مبتسم دائمًا، وبـ يشرحوا لك مكونات كل حاجة، خاصة الـ Brown Buff Sticks (الكيلو بـ 40 جنيه) ودي عبارة عن أصابع هشة شبه البقسماط بس معمولة من عدة حبوب صحية بـ تساعد على تثبيت الوزن، الصراحة إحنا أدمناها وبقينا نعدي كل شوية نجيب منها لأنها خفيفة جدًا وصحية وطعمها تحفة، كمان جربنا كرواسون الفيلادلفيا (8 جنيه)، خفيفة جدًا وهشة، الجبن محطوط بكرم ومش مليانة لبابة زي معظم المخبوزات.

خميرة عندهم عيش، جربنا نوعين منهم هما الفيينا البراون (7.50 جنيه)، واللى بالسن (3 جنيه)، أهم حاجة هـ نفضل نكررها الخفية، المخبوزات هشة وخفيفة ومش مزيتة خالص، من الآخر فى الجون، ودى أهم حاجة لشخص حابب يأكل عيش على الصبح ومش عاوز يحس بثقل باقى اليوم، ولأن بالنسبة لنا قسم الحلويات بـ يبين حرفية المكان وتمكنه من الصنعة كان لازم نجربه، جربنا نوعين جاتوه: بروفيترول، وتشيز كيك بالبلوبيري (13 جنيه القطعة)، دي أول مرة فى حياتنا نأكل بروفيترول خفيفة كده ونفسنا ما تجزعش منها، الشوكولاتة والصوص سكرهم هادى والطعم حلو جدًا، التشيز كيك كان سكرها أكتر منها شوية بس برضه كانت كريمية وطرية وطعمها حلو أوى.

خميرة من الآخر أسعار معقولة، ومخبوزات عالية الجودة؛ تقدر تقول لأ؟

نصيحة 360

صفحة خميرة على الفيسبوك.

أحسن حاجة

المخبوزات خفيفة جدًا وفيه تشكيلة كبيرة منها صحية.

أسوأ حاجة

خدمة التوصيل خارج الشيخ زايد غالية شوية، بـ تزيد قيمتها حوالى 25: 30 جنيه.

Map Data
Map data ©2016
Map DataMap data ©2016
Map data ©2016

أكتب تقييم

أضف تعليقاً

برجاء تسجيل الدخول لكي تتمكن من اضافة تعليق.

مقترح